Африка пингвинлари жанубий Африка соҳиллари яқинида балиқ захираларининг кескин қисқариши туфайли жадал суръатда йўқолиб бормоқда. Бу ҳақда ТАСС ЖАРнинг Қўриқхоналар, ўрмон хўжалиги ва балиқчилик вазирлиги ҳамда Буюк Британиянинг Эксетер университети тайёрлаган ҳисоботга таяниб хабар берди.

Олимларнинг таъкидлашича, охирги 30 йилда Африка пингвинлари популяцияси 95 фоизга қисқарган ва тур йўқолиб кетиш арафасида турибди.

Асосий сабаб сифатида пингвинларнинг асосий озуқа манбаи — сардин ва анчоуслар популяциясининг камайиши натижасида юзага келган ва давом этаётган очлик кўрсатилмоқда.

«Ҳозирча илмий жиҳатдан тўлиқ тушунтириб бўлмаган сабабларга кўра, сардин ва анчоуслар ЖАР ва Намибия соҳилларидаги қатор ҳудудларни тарк этган. Бу ҳудудларда пингвинлар жойлашади ва бачадорлик даврини ўтказади», — дейилади ҳисоботда.

Маълум қилинишича, 2004–2011 йиллар оралиғида фақатгина ЖАР ҳудудида очлик сабаб 60 мингдан ортиқ пингвин нобуд бўлган. Ҳозир Африкада ёввойи табиат шароитида тахминан 20 мингга яқин пингвин қолган.

Жанубий Африканинг BirdLife South Africa номли экологик ННТ мутахассисларининг баҳолашича, 2036 йилга келиб Африка пингвинлари тур сифатида бутунлай йўқолиши мумкин.