“Халқ сўзи” сайтида “Мундиал сари” рукни давом этади. Бугунги сонимизда Чехия Республикаси терма жамоасига тўхталамиз.

Умумий маълумотлар

Чехия футбол ассоциацияси 1901 йилда ташкил этилган. Ушбу мамлакат 1907 йилдан бери FIFAнинг аъзоси ҳисобланади. Шунингдек, мамлакат 1954 йилда Европа Футбол Ассоциацияси, яъни UEFAнинг расмий аъзосига айланган.

Чехия миллий терма жамоаси тарихдаги дастлабки ўйинини 1903 йил 5 апрелда Венгрия терма жамоасига қарши ўтказган ва мазкур баҳсда 2:1 ҳисобида мағлубиятга учраган. Чехия термаси тарихдаги энг йирик ғалабасини Андорра термаси устидан қўлга киритган. 2005 йил Либерец шаҳрида бўлиб ўтган мазкур баҳсда чехлар 8:1 ҳисобида ғалаба қозонган.

Чехия миллий терма жамоаси футбол бўйича Жаҳон чемпионатларида жами 10 марта иштирок этган. Ушбу мамлакат мустақилликка эришгунга қадар, яъни 1993 йилгача мундиалларда Чехословакия номи билан қатнашган. Жамоанинг мундиалдаги дастлабки иштироки 1934 йилда кузатилган бўлиб, ўшанда жамоа мусобақа финалига қадар етиб борган. Шунингдек, Чехословакия термаси 1962 йилги мусобақада ҳам вице-чемпионликни қўлга киритган. Бу мамлакатнинг Жаҳон чемпионатидаги энг яхши натижаси ҳисобланади.

Чехия миллий терма жамоаси Европа чемпионати (“Евро”) мусобақасида 11 марта иштирок этган ва ушбу турнирларнинг 1 тасида чемпионликни қўлга киритган.

Шунингдек, Чехия терма жамоаси 1997 йил FIFA томонидан ташкил этилган Конфедерациялар кубоги мусобақасида қатнашган ва турнирни учинчи ўринда якунлаган.

Жаҳон чемпионати сари босиб ўтган йўли

Европада Жаҳон чемпионати саралаши 2 та асосий босқичдан иборат бўлди. Чехия терма жамоаси саралашдаги иштирокини “L” гуруҳида бошлади. Гуруҳда чехлардан ташқари Хорватия, Фарер ороллари, Черногория ва Гибралтар терма жамоалари бор эди.

Мазкур гуруҳга қуръа ташланганида ушбу бешликда Хорватия термаси фаворит экани таъкидланган эди. Амалда ҳам шундай бўлди. Загребда Чехияни 5:1 ҳисобида мағлуб этган Хорватия 22 очко билан гуруҳда ғолиб бўлди. Чехия термаси эса 16 очко билан иккинчи ўринни эгаллаб, саралашнинг иккинчи босқичига йўл олди.

Қуръа натижасига кўра, жамоа плей-оффда аввал Ирландия билан куч синашди. Учрашувнинг асосий вақти 2:2 ҳисобида дуранг билан якунланди ва пенальтилар сериясида омад чехларга кулди.

Ҳал қилувчи ўйинда эса Чехия термаси Дания билан куч синашди. Бу баҳснинг асосий вақти ҳам дуранг билан тугади ва ғолиб пенальтилар сериясида аниқланди. Бу сафар ҳам омад Чехия томонида бўлди ва жамоа мундиалга йўлланмани қўлга киритди.

Сўнгги ўйинлар

Чехия терма жамоаси 2025–2026 йилларда жами 10 та ўйин ўтказди. Уларнинг 4 тасида ғалаба қозонди, 4 та ўйинда дуранг қайд этилди ва 2 та ўйинда мағлуб бўлди.

Жамоа Фарер ороллари ва Хорватияга қарши ўйинларда мағлуб бўлган бўлса-да, Черногория, Дания ва Ирландия термаларини мағлуб этишни уддалади.

Бош мураббий

Айни вақтда Чехия терма жамоасини маҳаллий мутахассис Мирослав Коубек бошқармоқда. 74 ёшли мутахассис жамоани 2025 йил декабр ойидан бери бошқариб келмоқда.

У бунга қадар Чехиянинг турли ёш тоифаларидаги терма жамоаларида, шунингдек “Виктория Пльзень”, “Кладно”, “Баник Острава”, “Славия Прага” каби клубларда ишлаган.

Мирослав Коубек мураббий сифатида “Кладно” билан иккинчи дивизионда ғолиб бўлган, “Виктория Пльзень” билан эса 2015 йил Чехия чемпионати ва Суперкубогини қўлга киритган. 2024 йилда у Чехия чемпионатининг энг яхши мураббийи деб топилган.

Футболчилар

Айни вақтда Чехиялик энг машҳур футболчилар ҳақида гап кетса, қуйидагиларни эслаб ўтиш мумкин:

Ладислав Крейчий – (“Вулверҳэмптон”, Англия);

Патрик Шик – (“Байер”, Германия);

Павел Шульц – (“Лион Олимпик”, Франция);

Адам Карабец – (“Лион Олимпик”, Франция);

Антонин Кински – (“Тоттенҳэм”, Англия);

Томаш Соучек – (“Вест Ҳэм”, Англия).

Жаҳон чемпионатидаги ўйинлари ва учрашувлар санаси

Чехия миллий терма жамоаси Жаҳон чемпионати мезбони сифатида турнирнинг “A” гуруҳидан ўрин олди. Гуруҳда ушбу мамлакатдан ташқари Мексика, Жанубий Корея ва Жанубий Африка Республикаси терма жамоалари ҳам мавжуд.

Ушбу терма жамоаларга қарши баҳслар қуйидаги саналарда бўлиб ўтади:

Жанубий Корея – Чехия (12 июнь);

Чехия – ЖАР (18 июнь);

Чехия – Мексика (25 июнь).

Жамоанинг мундиалдаги имкониятлари

Кўпчилик мутахассислар томонидан Чехия терма жамоаси ушбу гуруҳда фаворитлардан бири сифатида баҳоланмоқда. Жамоа катта эҳтимол билан гуруҳда пешқадам бўлиши мумкин.

Бироқ Чехияни ҳозир энг юқори формада деб бўлмайди. Шу сабабли жамоа учун нимчорак финалгача етиб бориш асосий вазифа бўлиши мумкин.

Агар жамоа гуруҳдан чиқишни уддаласа, улар 120 дақиқалик ўйинлар ва пенальтилар сериясига тайёр ҳолда келади. Бу эса кейинги босқичларда Мирослав Коубек бошқарувидаги жамоага қўл келиши мумкин.