Аҳоли билан бевосита мулоқот қилиш, жамиятда инсон манфаати устуворлигини таъминлаш, ҳудудларда истиқомат қилувчи фуқароларнинг оворагарчилигини олдини олиш ҳамда уларга қулайлик яратиш мақсадида Олий суд раисининг ўринбосари Шуҳрат Полвонов бошчилигида Самарқанд вилоятида суд масалаларига доир сайёр қабуллар ўтказилди.

Иштихон ва Ургут туманларида ташкил этилган сайёр қабуллар давомида 109 нафар фуқаро қабул қилинди. Қабул қилинган фуқаролар мурожаатларининг 52 таси жиноят, 44 таси фуқаролик, 1 таси иқтисодий ҳамда 12 таси маъмурий судловга оид мурожаатларни ташкил этди. Шундан 62 нафар фуқаронинг оғзаки мурожаати, 47 та ёзма ариза қабул қилинди. 68 та мурожаатга ҳуқуқий тушунтириш берилди, 6 та мурожаат қаноатлантирилди, 35 та шикоят ва ариза қонуний кўриб чиқиш учун қабул қилинди.

Сайёр қабулдан сўнг Олий суд раиси ўринбосари Ш.Полвонов ва самарқандлик судьялар Ургут тумани Деҳқонобод маҳалласида жойлашган таниқли шоир ва ёзувчи Абдусаид Кўчимов кутубхонасига ташриф буюриб, бу ерда китобхонлар учун яратилган шароитлар билан танишди.

Шу ерда фуқаролар билан давра суҳбати ҳам ташкил қилинди. Маҳалла аҳли ва китобхонлар билан учрашувда Олий суд раҳбарияти бугунги суд-ҳуқуқ ислоҳотлари, қонунчиликдаги янгиликлар, давлатимизнинг бу соҳадаги одилона сиёсати, сайёр қабулларнинг аҳамияти ва самараси ҳақида тушунча бериб ўтди. Шунингдек, юртимизда китобхонлик маданиятини ошириш, халқимизнинг маънавий оламини бойитишда бу каби зиё масканларининг муҳим ўрин тутиши таъкидланди.

Шу ўринда айтиш керакки, «Нуроний» жамғармаси туман бўлими ташаббуси билан жазо ўтаётган бир гуруҳ маҳкумлар ушбу кутубхонага жалб қилинган. Бу эса уларнинг китоб ўқиб, оқ-қорани англаб, тўғри йўлга киришига хизмат қиляпти. Кутубхонага аъзо бўлган жазони ижро этувчиларнинг 10 нафари қўйилган талабларни бажариб, ўндан ортиқ китобларни ўқиб ўзлаштирганлиги ортидан соғлом турмуш тарзига қайтганлиги сабабли, Пробация бўлимига ижобий тавсифнома берилган.

Олий суд раиси ўринбосари Шуҳрат Полванов бу ташаббусни қўллаб-қувватлаб, Пробация бўлими ва жиноят ишлари бўйича Ургут туман суди раисига ҳар бир ҳолатни алоҳида ўрганиб, қонун доирасида ёрдам бериш вазифасини топширди.

Шу асосда кутубхонада Жиноят ишлари бўйича Ургут туман судининг сайёр суд мажлиси ташкил этилди. Сайёр судда ҳар бир ҳолат алоҳида кўриб чиқилиб, 10 нафар маҳкум ўталмай қолган ахлоқ тузатиш ишлари ва бошқа жазолардан муддатидан илгари шартли равишда озод қилинди.

— Жиноят ишлари бўйича Ургут туман суди, туман Ички ишлар бўлими ҳамда Нуроний жамғармаси туман бўлими ўртасида имзоланган меморандум асосида пробация назоратида турган 53 нафар фуқароларни кутубхоналарга аъзо қилиб, китоб ўқишга жалб қилдик, — дейди Нуроний жамғармаси Ургут туман бўлими раиси Қуддус Асқаров. — Уч ойлик кузатишларимиз давомида улардан 10 нафарида кўпроқ китоб ўқиб, унинг мазмун-моҳиятига етиб, ижобий ўзгаришлар кузатилди. Биз Нуроний жамғармаси туман бўлими томонидан Жиноят ишлари бўйича Ургут туман судига тўғри йўлга қайтган ўша 10 нафар маҳкумни ўталмай қолган ахлоқ тузатиш ишлари ва бошқа жазолардан муддатидан олдин шартли равишда озод қилишни сўраб илтимоснома киритдик. Бугун шунинг ижроси сифатида айнан шу ерда, яъни Абдусаид Кўчимов кутубхонасида сайёр суд бўлиб ўтди. Унда ўнгланиш йўлига ўтган 10 нафар жазони ижро этувчи фуқаролар муддатидан олдин жазодан озод этилди. Келгусида ҳам озод қилинганларнинг ҳар бирини маҳаллаларимиздаги фаол нуронийларимизга бириктириб, улар билан ишларимизни давом эттирамиз.

Муддатидан олдин жазодан озод этилганлар ҳам бундай имкониятдан мамнун эканликларини билдиришди.

— Содир этган жиноятим оқибатида 2020 йилнинг октябрь ойида 6,5 йил муддатга озодликдан маҳрум этилган эдим, — дейди Жартепа МФЙ да яшовчи Ринат Хушназаров. — Китобга ошно бўлиб, тўғри йўлга қайтганимни ҳисобга олиб, мана бугун жазодан муддатидан олдин шартли равишда озод қилиндим. Бунинг учун шундай имконият яратиб берган юртбошимиздан миннатдорман. Энди жамиятга фойдаси тегадиган иш билан шуғулланишга ҳаракат қиламан.

Тадбирда шунингдек, Олий суд раҳбарияти томонидан Абдусаид Кўчимов кутубхонаси фондига янги китоблар жамланмаси совға қилинди.

Абдулазиз ЙЎЛДОШЕВ, «Халқ сўзи».