Олий Мажлис Сенатининг Ёшлар, хотин-қизлар, маданият ва спорт масалалари қўмитаси раиси Орзигул Қозихонова Россия Федерациясининг Уфа шаҳрида бўлиб ўтган «Аёллар бахти ҳудуди» халқаро форумида иштирок этди.

Тадбир доирасида Бошқирдистон Республикаси раҳбари Радий Хабиров ҳамда «Территория счастья» хайрия жамғармаси Васийлик кенгаши раиси Карине Хабирова билан учрашувлар ўтказилди.

Форумнинг «Аёл дунёни бирлаштиради» мавзусидаги сессиясида О.Қозихонова маъруза қилиб, мамлакатимизда хотин-қизларни ҳар томонлама қўллаб-қувватлаш, уларнинг ҳуқуқ ва қонуний манфаатларини ҳимоя қилиш, гендер тенгликни таъминлаш ҳамда ижтимоий-сиёсий жараёнлардаги иштирокини кенгайтириш борасида амалга оширилаётган ислоҳотлар ҳақида сўз юритди.

Шунингдек, Ўзбекистон ташаббуси билан ташкил этилаётган Осиё хотин-қизлари форуми, унинг мақсад ва вазифалари ҳамда хотин-қизларнинг минтақавий ҳамкорликни мустаҳкамлашдаги ўрни хусусида тақдимот ўтказилди.

Муҳокамалар давомида хотин-қизларнинг жамият тараққиётидаги ўрни, гуманитар ҳамкорликни кенгайтириш, оилавий қадриятларни мустаҳкамлаш ва ижтимоий ҳимоя масалалари юзасидан фикр алмашилди. Форум иштирокчилари томонидан Ўзбекистонда хотин-қизларнинг ҳуқуқ ва манфаатларини таъминлаш борасида амалга оширилаётган ишлар юқори баҳоланди ҳамда гуманитар ва маданий соҳаларда ҳамкорликни янада кенгайтиришга қизиқиш билдирилди.

Форум давомида иштирокчилар Бошқирдистон Республикасида хайрия фаолияти ва паллиатив тиббий ёрдам соҳасида тўпланган илғор тажрибалар ҳамда Уфа шаҳридаги «Уфа хосписи» фаолияти билан танишдилар.