Олий Мажлис Сенатининг Фан, таълим ва соғлиқни сақлаш масалалари қўмитаси раиси Одилжон Маматкаримов Наманган вилоятига хизмат сафари доирасида аҳоли муаммоларини ўрганиб, фуқаролар билан очиқ мулоқотлар ўтказди.

Уйчи туманидаги 4-сонли техникумда сайёр қабул ташкил этилиб, фуқароларнинг мурожаатлари эшитилди. Улар ижтимоий соҳа, бандлик, таълим, соғлиқни сақлаш масалаларига тааллуқлидир. Мурожаатларнинг аксарияти жойида ижобий ҳал этилди, қўшимча ўрганиш талаб этиладиган масалалар бўйича эса мутасадди ташкилотлар раҳбарлари зиммасига тегишли вазифалар юклатилди.

Жумладан, тиббиёт муассасаларидан бирини портатив ЭКГ аппарати билан таъминлаш масаласи кўтарилди. Мазкур мурожаат юзасидан вилоят соғлиқни сақлаш бошқармаси раҳбарияти билан мулоқот қилиниб, муассасани зарур тиббий жиҳоз билан таъминлаш чоралари белгиланди.

Яна бир мурожаатда аҳолига қулайлик яратиш мақсадида маҳаллалардан бирида коммунал тўловларни амалга ошириш имконини берувчи банкомат ўрнатиш масаласи кўтарилди. Ушбу масала ҳам ўз ечимини топди.

Бундан ташқари, сенатор ижтимоий ҳимояга муҳтож оилалар, ёлғиз кексалар ва нуронийлар ҳолидан ҳам хабар олди.