Ҳарбий қисм қўмондонлиги тавсияномасига эга абитуриентлар ОТМларга қабулда алоҳида квоталар асосида танловда иштирок этади. Бу ҳақида Таълим хабарлари Telegram-каналида маълумот берилди.

Маълумот учун, ҳарбий қисм қўмондонлиги тавсияномаси Ўзбекистон Республикаси Қуролли Кучлари сафида муддатли ҳарбий хизматни ўтаган ва юксак натижаларга эришган ҳарбий хизматчиларга берилади.

Масалан, 2025 йилги ўқув йилида республика бўйича жами 9 766 та қўшимча квота ажратилган эди. Аммо бу имтиёздан фақат биринчи танланган йўналиш бўйича фойдаланиш мумкин. Иккинчи ва ундан кейинги йўналишларга бу имтиёз амал қилмайди.

Тавсияномага эга бўлган абитуриентлар қуйидаги имтиёзларга эга бўлади:

олий таълим муассасаларига (ҳарбий таълим муассасалари бундан мустасно) кирувчилар учун қабул параметрларидан ташқари қўшимча равишда алоҳида қабул кўрсаткичлари белгиланади;
алоҳида қабул кўрсаткичлари ҳар бир олий таълим муассасасининг ҳар бир таълим шакли (кундузги, кечки, масофавий) бўйича белгиланади;
тавсияномага эга абитуриентлар алоҳида қабул кўрсаткичлари доирасида танловда иштирок этади;
ушбу алоҳида квота доирасида ўқишга кира олмаган абитуриентлар, умумий танловда (оддий абитуриентлар қаторида) қайтадан иштирок этиб, ўқишга кириш имкониятига эга бўлади;
олий ҳарбий таълим муассасалари учун эса абитуриентларга тўплаган балларининг 50 фоизи миқдорида қўшимча балл берилади (мисол учун, абитуриент тест синовида 120 балл тўпласа, унга яна 60 балл қўшиб берилади).