Америкалик миллиардер Илон Маск OpenAI компаниясига қарши ўзи очиқлаган суд жараёнида сунъий интеллект «Терминатор» фильмида кўрсатилгани каби инсониятнинг ҳалокатига олиб келиши мумкинлигини таъкидлади. Бу ҳақда ТАСС хабар бермоқда.

«Биз ҳаммаси «Терминатор»даги каби тугашини истамаймиз. Биз ҳаммаси Жин Родденберрининг «Юлдузли йўл» (Star Trek) асаридагидек якун топишини хоҳлаймиз», — деди тадбиркор.

Маск 2015 йилда OpenAI бош директори Сэм Альтман билан сунъий интеллектни «ёмон одамлар»дан қандай ҳимоя қилиш борасида муҳокама ўтказганини таъкидлаб ўтди.

Миллиардернинг сўзларига кўра, хавотирлар Google ҳаммуассиси Ларри Пейж билан учрашувдан сўнг янада кучайган. Пейж Маскни одамларни келажакдаги рақамли ҳаёт шаклларидан устун қўяётганликда айблаган эди.

Илон Маск OpenAI компаниясининг асосчиларидан бири ҳисобланади. У компания директорлар кенгаши таркибида бўлган, бироқ 2018 йилда ундан чиқиб кетган.

2024 йилнинг март ойида Маск фирманинг тижоратлашуви сабабли OpenAI ва Альтманга қарши судга даъво аризаси билан мурожаат қилган эди.