Сўнгги йилларда ўзбек ва қирғиз халқлари ўртасидаги дўстона муносабатлар тобора мустаҳкамланиб, айниқса, маърифат, маънавият ва маданият соҳаларидаги алоқалар янги босқичга кўтарилмоқда. Жалақудуқ туманида қирғизистонлик ижодкор қаламига мансуб китоблар тақдимотининг ўтказилиши ана шу эзгу жараёнларнинг яна бир ёрқин намунаси бўлди.

— Ушбу китоблар тақдимотининг айнан Жалақудуқ туманида ўтказилаётгани бежиз эмас, — дейди Халқ депутатлари вилоят кенгаши депутати, Андижон вилоят қирғиз миллий маданий маркази раҳбари Носиржон Обидов. — Зеро, ушбу туманда 40 минг нафарга яқин қирғиз миллатига мансуб аҳоли истиқомат қилади. Ҳар иккала тўплам ҳудуд тарихини ўргатиш билан бирга халқлар ўртасидаги дўстона муносабатни янада мустаҳкамлашга хизмат қилади.

Қирғизистон Республикаси Ўш вилояти Новқат туманида яшаб, ижод қилаётган 90 ёшли адиб Набижон Жунусов қаламига мансуб «Саҳабалардин жолун уланткандар» («Саҳобалар йўлини давом эттирганлар»), «Ислом динибиздин Орто Азияга тарқалиши» («Ислом динининг Марказий Осиёга тарқалиши») китобларида бугунги авлод учун муҳим бўлган маънавий мерос, хусусан, минтақамизда ислом динининг шаклланиш ва ривожланиш жараёнлари ёритилган. Тадбир иштирокчилари мазкур асарлар халқлар ўртасидаги маънавий яқинликни янада кучайтиришга хизмат қилишини алоҳида таъкидладилар.

Саминжон ҲУСАНОВ, «Халқ сўзи».