БАА 1 майдан бошлаб ОПЕК ва ОПЕК+ ташкилотлари аъзолигидан чиқади. Бу ҳақда Reuters хабар бермоқда.

БАА энергетика вазири Суҳайл Муҳаммад ал-Мазруийнинг сўзларига кўра, қарор мамлакатнинг энергетика стратегиялари таҳлили асосида қабул қилинган. Абу-Даби ташкилотдан чиқиш бўйича шериклари билан келишмаган ҳолда қарор чиқарган.

«Бу сиёсий қарор бўлиб, у нефть қазиб олиш ҳажми билан боғлиқ жорий ва истиқболдаги сиёсатни синчиклаб таҳлил қилиш натижасида қабул қилинди», — дея қўшимча қилди у.

Reuters нашрининг ёзишича, Абу-Дабининг йўқотилиши геосиёсатдан тортиб қазиб олиш квоталаригача бўлган кўплаб масалалардаги ички келишмовчиликларга қарамай, одатда бирдамликни намойиш этишга интилган ташкилотни заифлаштириши мумкин.

Агентликнинг қайд этишича, БААнинг ташкилотдан чиқишини АҚШ Президенти Дональд Трампнинг ғалабаси сифатида баҳолаш мумкин. Трамп бир неча бор ОПЕКни нефть нархларини сунъий равишда ошириб, «бутун дунёни талаётганликда» айблаб келган эди.

Маълумот учун: ОПЕК — нефть қазиб олувчи давлатлар томонидан қазиб олиш квоталарини назорат қилиш учун тузилган халқаро ҳукуматлараро ташкилотдир. ОПЕК аъзолари жаҳон нефть захираларининг қарийб 2/3 қисмини назорат қилади. Уларнинг ҳиссасига дунё бўйича қазиб олишнинг тахминан 35 фоизи ва экспортнинг ярми тўғри келади. ОПЕК+ мамлакатлари эса жами бўлиб жаҳон нефть қазиб олиш ҳажмининг ярмини назорат қилади.

Амирликлар 1967 йилдан бери ташкилот аъзоси эди.