Ижтимоий тармоқларда Тошкент вилояти Оҳангарон шаҳрида патруль-пост хизмати ходими 14 ёшли қиз ва унинг дугонасига шаҳвоний шилқимлик қилгани ҳақида хабарлар тарқалди. Ички ишлар вазирлиги Жамоат хавфсизлиги департаменти мазкур ҳолат юзасидан текширув бошланганини маълум қилди.

Жабрланувчи томони тарқатган маълумотларга кўра, воқеа 28 апрелга ўтар кечаси содир бўлган. 14 ёшли қизнинг айтишича, 27 апрель куни соат 21:00 ларда у дугоналари билан уй олдидаги ўриндиқда ўтирган вақтда уларнинг олдига «Spark» автомобили келиб тўхтаган.

Автомобиль ҳайдовчиси уларни машинага чиқишга чақирган, қиз эса бунга рози бўлмаган. Шунга қарамай, эркак қўпол муомала қилиб, машинага ўтиришни талаб қилган. Қиз уни ички ишлар ходими бўлгани учун ўзига ҳеч нарса қилмайди, деб ҳисоблагани ва машинага ўтиришга мажбур бўлганини билдирган.

Унинг сўзларига кўра, шундан кейин эркак қизларни тоғли чекка ҳудудга олиб борган, машинасини тўхтатган ва уларга шилқимлик қила бошлаган. Шу вақтда қизнинг акаси, 18 ёшли Артём уларнинг геолокациясини кўриб, воқеа жойга етиб келган.

Артём томонидан эълон қилинган видеода «Spark» русумли машина бошқарувида бўлган шахс воқеа содир этилган вақтда нур қайтарувчи белгили махсус ҳарбий формада бўлганини пайқаш мумкин. Йигит машина эшикларини очишга ҳаракат қилган вақтида ҳайдовчи унинг бармоқларига жароҳат етказиб, воқеа жойидан қочиб қолган.

«Мен унинг машинаси эшигини очмоқчи бўлганимда у қўлимга нимадир санчиб олди. Бу ички ишлар ходими томонидан содир этилган педофилиядир. Бунга чек қўйишингизни сўрайман. Бу нормал ҳолат эмас. Бунинг олди олиниши керак. Уни қонун доирасида тўлиқ, ҳатто икки баравар қаттиқроқ жазолашингизни сўрайман, чунки у — милиция ходими. У қонунни бузиши эмас, балки ҳимоя қилиши керак», дейди қизнинг акаси.

Артём, шунингдек, ППХ ходими 14 ёшли синглиси билан тунги соат 01:00 да тоғда, машина ичида бўлгани мутлақо қабул қилиб бўлмайдиган ҳолат эканини таъкидлаган ва ҳуқуқий ёрдам сўраган.

Мазкур ҳолат ижтимоий тармоқларда катта резонансга сабаб бўлди. Фуқаролар воқеа тасвирланган видеолар изоҳида «ўзи бизни кимлар ҳимоя қиляпти», «аслида кимлардан ҳимояланишимиз керак», деган мазмундаги ташвишли фикрларини билдирмоқда. Дарҳақиқат, Ўзбекистон фуқаролари ҳаётида қандайдир хавф туғилган пайтда ИИО ходимларидан жисмоний ва ҳуқуқий кўмак кутади. Аммо юқоридаги каби салбий фактлар жамиятда тизим ходимларига нисбатан ишончсизлик пайдо бўлишига олиб келиши мумкин.

ИИВ Жамоат хавфсизлиги департаментининг воқеа юзасидан рус тилида эълон қилган расмий муносабатида ҳолат бўйича ИИВ Ўз хавфсизлиги бўлинмаси ҳамда прокуратура органлари томонидан биргаликда текширув олиб борилаётгани маълум қилинган.

Билдирилишича, ҳозирда воқеанинг барча иштирокчилари ва тафсилотлари аниқланган. Шунингдек, хабарларда тилга олинган ходим хизмат вазифасини бажаришдан четлатилган.

«Баён этилган фактлар тасдиқланган тақдирда, унинг хатти-ҳаракатларига қатъий ҳуқуқий баҳо берилади, ҳатто жиноий жавобгарликка тортишгача чора кўрилади», дейилади Департамент хабарида.

Қўшимча қилинишича, ички ишлар органлари ходимлари томонидан содир этиладиган ноқонуний хатти-ҳаракатлар, айниқса, вояга етмаган шахсларга нисбатан бўлган ҳолатлар «мутлақо йўл қўйиб бўлмас эканлигини ва қатъий чоралар кўрилишига сабаб бўлади».

Идора текширув натижалари ҳақида қўшимча маълумот беришини билдирган ва фуқаролардан фақат расмий ахборот манбаларига таянишларини сўраган.