2026 йил 20 апрель куни Олий Мажлис Қонунчилик палатасидаги Ўзбекистон Экологик партияси фракциясининг навбатдаги йиғилишида «Халқ депутатлари Кенгашлари фаолияти такомиллаштирилиши муносабати билан Ўзбекистон Республикасининг айрим қонун ҳужжатларига қўшимчалар киритиш тўғрисида»ги қонун лойиҳаси биринчи ўқишда кўриб чиқилди.

Таъкидланганидек, сўнгги йилларда халқ ҳокимиятчилигини тўлақонли рўёбга чиқариш борасида кенг кўламли ислоҳотлар амалга оширилмоқда.

Жумладан, халқ депутатлари маҳаллий Кенгашларининг ҳудудларни ижтимоий-иқтисодий ривожлантириш, ҳудудлардаги долзарб масалаларни ҳал этиш бўйича ваколатлари такомиллаштирилди. Конституцияда маҳаллий Кенгаш раиси ва ҳоким лавозимлари бир-биридан ажратилди. «Кучли Кенгаш, ҳисобдор ва ташаббускор ҳоким» тамойили изчиллик билан рўёбга чиқарилмоқда.

Қонун лойиҳаси билан Қорақалпоғистон Республикаси Жўқорғи Кенгеси Раиси, халқ депутатлари вилоят ва Тошкент шаҳар Кенгаши раиси Коррупцияга қарши курашиш бўйича ҳудудий кенгаш фаолиятига раислик қилиши белгиланмоқда. Лойиҳа билан маҳаллий Кенгашларнинг ваколатлари фақат қонун ҳужжатлари билан белгиланиши назарда тутилмоқда.

— Фракцияда муҳокама қилинган қонун лойиҳаси мамлакатимизда халқ депутатлари маҳаллий Кенгашларининг фаолиятини янада самарали ташкил этиш, ҳудудларда очиқлик ва ҳисобдорликни таъминлашга қаратилгани билан аҳамиятлидир, — дейди депутат Наврўз Юсупов.

Муҳокамалар якунида фракция аъзолари қонун лойиҳасини қўллаб-қувватладилар.