«Яна ишлаб келинг». Сирдарё вилояти шаҳарсозлик Кенгашининг навбатдаги йиғилишида муҳокама қўйилган 25 та қурилиш лойиҳасидан 21 таси қайтарилди. Хўш, нега бундай бўлди?

Маълум бўлишича, ҳозирча қурилишга рухсат берилмаган мазкур лойиҳаларнинг қайсидадир ҳисоб-китоб етишмайди, бошқасида инфратузилма етарли ўйланмаган, яна бирида аҳоли учун қулайликлар тўлиқ эътиборга олинмаган. Шу боис ушбу лойиҳалар мутасаддиларига «яна ишлаб келинг» дейилди, яъни қайта ишлаш, такомиллаштириш бўйича топшириқ берилди .

Кенгаш йиғилишида ижтимоий аҳамиятга эга объектлар бўйича 4 та лойиҳа маъқулланди. Яъни булар Ховос туманининг Оқчангал ва Гулбаҳор маҳаллаларида янги боғчалар барпо этилиши, Гулистон шаҳридаги 4- боғчани реконструкция қилиш ҳамда 7-умумий ўрта таълим мактабида 330 ўринли қўшимча ўқув биносини қуриш ҳамда мавжуд 800 ўринли биноларини таъмирлаш лойиҳаларидир.

Айтиш лозимки, шаҳарсозлик кенгаши муҳокамасига тақдим қилинган кўпгина лойиҳаларнинг рад этилиши ва уларни мукаммал даражага етказиш бўйича белгилаб берилган вазифалар тез орада қурилажак 21 та иншоотнинг юқори сифатида ўз самарасини кўрсатади.

Аҳмадали ШЕРНАЗАРОВ, «Халқ сўзи».