Олий Мажлис Сенатининг Бюджет ва иқтисодий масалалар қўмитасининг мажлисида «Қурилиш соҳасида давлат назорати ва бошқаруви янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги Қонун дастлабки тарзда муҳокама этилди.

Кейинги йилларда мамлакатимизда қурилиш соҳаси жадал ривожланиб, кўп квартирали уйлар қурилиши кескин ошди. Талафотли зилзилалар юз бериши эса аҳоли ҳаётига ҳамда мамлакатларнинг ижтимоий-иқтисодий инфратузилмаларига жиддий хавф солади.

Сенаторлар қурилиш соҳасидаги давлат назорати ва бошқарувини янада такомиллаштириш, бинолар ва иншоотларнинг зилзилабардошлигини ва сейсмик хавфсизлигини кучайтириш зарурати юзага келаётганини таъкидладилар.

Қонун билан Жиноят ва Маъмурий жавобгарлик тўғрисидаги кодексларга ўзгартириш ва қўшимчалар киритилиб, кўп квартирали уйларни Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекциясининг рухсатномасисиз қурганлик учун жавобгарлик кучайтирилмоқда.

Бундан ташқари, мазкур инспекциянинг сейсмик хавфсизликни таъминлаш соҳасидаги ваколатлари аниқлаштирилиб, шаҳарсозлик ҳужжатлари таркибига мастер-режа тушунчаси ҳам киритилмоқда.

Сенаторларнинг фикрича, кўриб чиқилган Қонун қурилиш соҳасидаги давлат назорати ва бошқарувини янада такомиллаштиради, қурилаётган бинолар ва иншоотларнинг зилзилабардошлигини ва сейсмик хавфсизлигини таъминлайди.

Шунингдек, Қўмита аъзолари ўз чиқишларида ушбу Қонун тегишли субъектларнинг бу борадаги ваколатларини аниқлаштиришга ҳамда шаҳарсозлик тўғрисидаги қонунчиликни такомиллаштиришга хизмат қилишини таъкидлаб ўтдилар.

Муҳокама якунида Қўмитанинг тегишли қарори қабул қилинди.