Жорий йилнинг 17 августидан Бирлашган Араб Амирликларининг «Etihad Airways» авиакомпанияси Ўзбекистонга мунтазам парвозларни бошлайди. Ушбу келишувга Транспорт вазири ўринбосари Жасурбек Чориев ҳамда «Etihad Airways» авиакомпанияси бош операцион директори капитан Мажед Ал-Марзуки билан бўлиб ўтган учрашувда эришилган.

Маълум қилинишича, авиакомпания бош офисида бўлиб ўтган учрашувда томонлар Ўзбекистон ва БАА ўртасидаги авиақатновларнинг бугунги ҳолати ва уни ривожлантириш истиқболларини муҳокама қилган.

Хусусан, «Etihad Airways» авиакомпаниясининг Ўзбекистонга мунтазам қатновларни йўлга қўйиш ҳамда босқичма-босқич йўналишлар тармоғини кенгайтириш билан боғлиқ масалалар кўриб чиқилган. Музокаралар якунига кўра, жорий йил 17 августидан эътиборан «Etihad Airways» томонидан Тошкент – Абу Даби – Тошкент йўналишида мунтазам авиақатновларни йўлга қўйиш бўйича келишувга эришилган.

«Ўзбекистон ҳамда БАА пойтахтлари ўртасида тўғридан тўғри авиақатновларнинг тикланиши Ўзбекистонлик йўловчиларнинг «Etihad Airways»нинг кенг кўламли йўналишлар тармоғидан фойдаланиш, Абу-Даби орқали қулай уланишлар билан Европа, Осиё, Австралия, Африка ва Шимолий Америкадаги 70 дан ортиқ халқаро йўналишларга учиш имконини беради», дейилади Транспорт вазирлиги хабарида.