Юртимизда инсон қадрини улуғлаш, аҳолини ижтимоий ҳимоя қилиш, жамиятда меҳр-оқибат, саховат ва ҳамжиҳатлик муҳитини мустаҳкамлаш давлатимиз сиёсатининг устувор йўналишларидан бирига айланган.

Ўзбекистон Республикаси Президентининг “Муборак Қурбон ҳайити муносабати билан аҳолини давлат томонидан қўллаб-қувватлаш ва меҳр-саховат тадбирларини самарали ташкил этиш тўғрисида”ги қарори юртимизда инсон қадрини улуғлаш, аҳоли саломатлигини муҳофаза қилиш ва эҳтиёжманд оилаларни қўллаб-қувватлаш борасидаги эзгу ишларга янада кенг йўл очди.

Мазкур қарор ижроси доирасида Самарқанд вилоятида ҳам кенг қамровли ишлар бошланди. Хусусан, даволанишга муҳтож болалар, онкогематологик хасталикларга чалинган беморлар ҳамда трансплантацияга эҳтиёжи бор фуқароларни юқори технологик тиббий муолажалар асосида соғломлаштириш чоралари изчил амалга оширилмоқда.

Вилоят ҳокимлиги, соғлиқни сақлаш тизими ва Ижтимоий ҳимоя миллий агентлиги ходимлари ҳамкорлигида шаҳар ва туманларда эҳтиёжманд фуқаролар хатловдан ўтказилди. Натижада 1026 нафар фуқарони, жумладан, болалар, онкогематологик касаллар ва трансплантацияга муҳтож аҳолини даволаш режалаштирилди.

Айни кунга қадар даволаниши белгиланган 764 нафар бемор боладан 600 нафарига “Вақф” хайрия жамоат фонди, Соғлиқни сақлаш вазирлиги ҳамда Ижтимоий ҳимоя миллий агентлиги томонидан тақдим этилган ваучерлар топширилди.

Ҳозирда уларни тегишли шифохоналарга ётқизиш ишлари олиб борилмоқда. Шу пайтгача 6 нафар бола шифохонага жойлаштирилиб, уларнинг 3 нафарида мураккаб жарроҳлик амалиётлари муваффақиятли ўтказилди.

— Ҳаётда ота-она учун фарзандининг саломатлигидан-да ортиқроқ бахт бўлмаса керак? Мурғаккина жигарбандим туғма юрак нуқсони билан туғилгач буни яна бир бор ҳис қилдим. Болам яхши бўлармикан, деб кечалари ухламай чиқар эдим. — дейди ургутлик Фарзона Ражаббоева. — Қарийб бир йилдан буён фарзандимни даволатмаган жой қолмади. Аммо шифокорлар болада жарроҳлик амалиёти ўтказиш зарурлигини айтарди. Не бахтки, Қурбон ҳайити муносабати билан Президентимизнинг тегишли қарорига асосан ажратилган маблағлар ҳисобидан шу кунларда мамлакатимиз бўйлаб ўтказилаётган юқори технологик жарроҳлик амалиётлари бизнинг ҳаётимиздаги энг унутилмас лаҳзалардан бири бўлди. Ушбу хайрли тадбир доирасида менинг фарзандимда ҳам Самарқанд вилоят кўп тармоқли болалар тиббиёт марказида имтиёзли равишда ўтказилган юқори технологик амалиёт муваффақиятли бажарилди, бу эса бизнинг оиламизга бир олам қувонч олиб кирди. Президентимиздан миннатдормиз. Ёрдам бергани учун минг-минг раҳматлар айтамиз.

Нурободлик Гулҳаё Авазова ҳам фарзандининг туғма юрак нуқсони билан оғриганидан тушкун аҳволга тушиб қолган эди. Давлатимизнинг ғамхўрлигидан бугун ушбу оила ҳам баҳраманд бўлди.

— Жуда қийналиб юрган эдик, врачларнинг ўзлари чақирди, Президентимиз Қурбон ҳайити муносабати билан пул ажратган экан. Шунинг ҳисобидан икки ёшли фарзандимда имтиёзли равишда юқори технологик жарроҳлик амалиёти ўтказилди, — дейди Гулҳаё Авазова. — Бундай хайрли ва эзгу тадбир жуда хурсанд бўлдик. Бизни – халқни ўйлаган Президентимизга минг раҳмат.

Шунингдек, вилоятда онкологик касалликларга чалинган 250 нафар бемордан 60 нафарига ваучерлар тарқатилди. Уларнинг 20 нафари даволаниш учун шифохоналарга ётқизилди. Гематологик ва онкогематологик касалликларга чалинган 14 нафар беморнинг барчасига ваучерлар берилган бўлиб, 3 нафари стационар даволанишга қабул қилинди.

Трансплантация амалиётлари бўйича ҳам муҳим ишлар амалга оширилмоқда. Жумладан, жигар трансплантацияси 1 нафар бола ва 14 нафар катта ёшли беморда, буйрак трансплантацияси эса 5 нафар бола ва 19 нафар катта ёшли беморда ўтказилиши режалаштирилган. Умумий ҳисобда 39 нафар бемор юқори технологик жарроҳлик амалиёти билан қамраб олинади. Ҳозиргача 6 нафар беморга ваучерлар топширилиб, уларни шифохоналарга жойлаштириш ишлари бошланган.

Режалаштирилган мураккаб жарроҳлик ва даволаш ишлари вилоят болалар кўп тармоқли тиббиёт маркази, Республика ихтисослаштирилган онкология ва радиология илмий-амалий тиббиёт маркази, вилоят кўп тармоқли тиббиёт маркази ҳамда республика ихтисослаштирилган марказларида амалга оширилади.

Нарпайлик Саодат Хидирова 4 йилдан буён гематологик дардга чалиниб, даволаниб келади. Унда гемапоэтик суяк кўмиги ўзак ҳужайраларини трансплантaция қилиш амалиётини ўтказиш зарур эди.

— Аммо мутахассислар бу турдаги мураккаб амалиётни ўтказиш учун катта маблағ зарурлигини айтишар эди, — дейди Саодат Хидирова. — Мана Қурбон ҳайити муносабати билан Президентимизнинг тегишли қарорига асосан ажратилган маблағлар ҳисобидан менда ҳам Самарқанд вилоят кўп тармоқли тиббиёт марказида суяк кўмиги ўзак ҳужайраларини кўчириб ўтказиш амалиёти имтиёзли равишда бажариладиган бўлди. Бундай имкониятдан беҳад хурсандман.

Энг муҳими, инсон қадр қимматини ўзида ифода этган Президент ташаббуси минглаб беморларни дарддан фориғ бўлишига, уларни соғлом ҳаётга қайтишига замин яратиб, минглаб оилаларга эса қувонч олиб кирмоқда.

Абдулазиз ЙЎЛДОШЕВ,

“Халқ сўзи”.