Жиззах вилояти туманларига Зарафшон дарёсидан сув олиб келинади

13:59 31 Январь 2019 Сиёсат
1065 0

Фото: Ўзбекистон Республикаси Президентининг Матбуот хизмати.

Жиззах шаҳрида вилоят фаоллари, давлат ва жамоат ташкилотлари раҳбарлари иштирокида йиғилиш бўлиб ўтмоқда. Бу ҳақда Ўзбекистон Республикаси Президентининг Матбуот хизмати хабар берди.

Ўзбекистон Республикаси Президенти Шавкат Мирзиёев “Инсон манфаатлари — ҳамма нарсадан устун” деган тамойил асосида халқимиз ҳаётини яхшилаш, ҳудудларни обод қилиш бўйича амалга оширилаётган ишларни қайд этди.

Хусусан, ўтган йили март ойидаги ташриф доирасида ишлаб чиқилган дастурга асосан, Жиззах вилоятида 107 та йирик ва ўрта инвестиция лойиҳалари бўйича янги объектлар ишга туширилган.

— Бугунги кундаги энг муҳим вазифа инвестиция ва технологиялар олиб келиб, янги корхоналар ташкил этиш, одамларни иш билан таъминлаш, турмуш шароитларини яхшилаш, — деди Шавкат Мирзиёев.

Шу мақсадда 2019-2020 йилларда вилоятда умумий қиймати 21 триллион 956 миллиард сўмлик бўлган 586 та инвестиция лойиҳаси дастури ишлаб чиқилгани, бунинг натижасида 22 минг 300 дан зиёд иш ўринларини яратиш режалаштирилгани маълум қилинди. Фориш туманида базальт толаси ва шамол энергияси қурилмалари, Дўстлик туманида қуёш панеллари, Зомин туманида дори воситалари, Жиззах шаҳрида безакли ҳамда юпқа ойна ишлаб чиқариш лойиҳалари ана шулар жумласидандир.

Қишлоқ хўжалигини ривожлантириш, чорвачилик, балиқчилик, паррандачилик, пиллачилик тармоқларига мос мавжуд имкониятларни юзага чиқариш бўйича топшириқлар берилди.

Аҳолининг маиший шароитларини, ижтимоий инфратузилмани яхшилаш масалаларига ҳам алоҳида эътибор қаратилди.

— Мирзачўлда қилинган ишлар яхши тажриба, намуна бўлди. Энди Жиззах вилоятининг ҳар бир тумани марказини шу тарзда обод қилиш, зарур қурилиш-таъмирлаш ишларини шу йилнинг ўзида якунлаш керак, — деди давлатимиз раҳбари.

Шунингдек, жорий йилда Жиззах шаҳрида 15 та кўп қаватли арзон уй, туманларда 932 та тураржой қуриш вазифаси қўйилди. Зарафшон дарёсидан сув олиб келиш учун магистрал қувур ва насос станцияси қуришни давом эттириш, 264 километр сув тармоғини қуриш ҳамда таъмирлаш бўйича топшириқ берилди. Бу ишлар натижасида Зарбдор, Бахмал, Пахтакор, Мирзачўл, Дўстлик, Ғаллаорол, Шароф Рашидов туманларидаги аҳоли тоза ичимлик суви билан таъминланиши, уларнинг турмуш тарзи, саломатлиги яхшиланиши таъкидланди.


Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?


Кўп ўқилганлар

Afisha

Муштарийлар учун ажойиб янгилик!

Юқоридаги суратда бунинг учун нима қилиш лозимлигини томоша қилишингиз мумкин.

02 Декабрь 2019