Ўзбекистон Республикасида ҳар бир фуқаронинг, жумладан, ёлланма ишчиларнинг ҳам ҳуқуқий манфаатлари қонун доирасида ҳимояланган. Шундай бўлишига қарамай, бунга ҳар доим ҳам амал қилинмайди. Ҳудудларда фаолият кўрсатаётган ноқонуний мардикор бозорлари бунга мисолдир. Андижон шаҳрида фуқароларни бир марталик иш билан таъминлаш марказининг фойдаланишга топширилиши бу борадаги салбий ҳолатларга барҳам берди. Энди ҳар бир ёлланма ишчи ижтимоий-ҳуқуқий жиҳатдан ҳимояланган.

- Фойдали ижтимоий меҳнат билан банд бўлмаган ёки қўшимча маблағ топиш истагида бўлган юртдошларимиз шу кунгача ноқонуний мардикор бозорида бир марталик иш излаб кўп овора бўлмоқда эдилар,-дейди вилоят бандликка кўмаклашиш бош бошқармаси раҳбари Иқболжон Матрўзиев. – Марказнинг ишга туширилиши натижасида ҳар бир фуқарони ҳунари ва имкониятига яраша иш билан таъминлашни йўлга қўйдик. Энг муҳими, улар учун иш қуролларининг барчаси марказ томонидан таъминланади. Ёлланма ишчилар манфаатлари мутахассисларимиз томонидан назоратга олинган.

Марказда ёлланма ишчилар учун овқатланиш, дам олиш, ювиниш хоналари ва тиббиёт хизмати ташкил этилган. Доимий иш билан таъминланишни истаганлар учун бўш иш ўринлари тўғрисидаги маълумотлар эълон қилиб борилмоқда. Ёлланма ишчилар ва иш берувчилар меҳнат муҳофазаси тўғрисидаги маълумотлар билан таништирилмоқда.

Саминжон Ҳусанов,
“Халқ сўзи” мухбири.