Шерзод Шерматов Хоразм вилояти ҳокимини "Таълим ҳомийси" кўкрак нишони билан тақдирлади

09:55 05 Октябр 2020 Жамият
256 0

Хоразм вилояти ҳокимлиги биносида Ўзбекистон Республикаси Халқ таълими вазири Шерзод Шерматов иштирокида тақдирлаш маросими бўлиб ўтди.

Маросимда Хоразм вилояти ҳокими Ф.Эрманов, вилоят ҳокими ўринбосарлари, вилоят халқ таълими бошқармаси бошлиғи Х.Бектемиров, туман, шаҳар халқ таълими бўлими мудирлари, фаол ва фахрий устозлар ҳамда вилоятдаги бошқа ташкилот вакиллари иштирок қилдилар.

Тадбирда Ўзбекистон Республикаси Халқ таълими вазири Ш.Шерматов сўзга чиқиб, Хоразм вилояти ҳокими Ф.Эрманов томонидан таълим соҳасига қаратилган эътибор, хусусан, маҳаллий ҳокимлик маблағлари ҳисобидан умумтаълим мактабларида амалга оширилган ишлар, мактабларга ичимлик сувини тозалаб берувчи қурилманинг ўрнатилиши, мактаб ҳожатхонаси таъмири, сунъий қопламали спорт майдончаларининг қурилишидаги ташаббуси, шунингдек, умумтаълим мактабларига SATT платформасининг ўрнатилиши ва бу орқали мактаб битирувчиларининг олий таълим муассасаларига киришга тайёргарлик ишларини тизимли йўлга қўйишдаги хизматларини алоҳида эътироф қилди.

Ш.Шерматов вилоят ҳокими Ф.Эрмановни таълим соҳаси ривожига қўшган улкан ҳиссаси, хусусан, умумий ўрта таълим мактабларининг моддий-техник базасини мустаҳкамлаш юзасидан амалга оширган ишлари учун Ўзбекистон Республикаси Халқ таълими вазирлигининг «Таълим ҳомийси» кўкрак нишони билан тақдирлади.

Вилоят ҳокими Ф.Эрманов вилоятда иқтисодий-ижтимоий ва маънавий муҳит барқарорлигини таъминлаш ҳамда ёш авлодни етук баркамол инсон қилиб тарбиялаш борасида ўзининг ташаббускорлигини кўрсатиб келмоқда. Шахсан ҳокимнинг ташаббуси билан вилоят халқ таълими бошқармаси тасарруфидаги 543 та мактаб ҳожатхоналари бугунги кун талабларига мос келадиган замонавий лойиҳа асосида тўлиқ таъмирланди ва шундан 86 таси янгидан қурилди. Таълим муассасаларини тоза ичимлик сув билан таъминлаш, 68 та мактабда иситиш тизимини янгилаш, мактабларнинг узлуксиз интернет тезлигини ошириш учун оптик толали тармоқ билан таъминлаш, мактабларни жорий таъмирлаш ишларининг амалга оширилиши, шунингдек, Ф.Эрмановнинг ташаббуси билан тадбиркорлар жалб қилиниб, мактабларда сунъий қопламали спорт майдончаларининг қурилиши, мактаб битирувчиларини олий таълим муассасаларига киришга тайёргарликларини ташкил қилиш учун зарур бўлган SATT (самарали автоматлаштирилган таълим тизими) платформасини вилоятдаги барча мактабларга ўрнатилиши, вилоят халқ таълими тизимида Ўзбекистон Республикаси Президенти томонидан илгари сурилган бешта муҳим ташаббусни самарали жорий этиш учун зарур бўлган спорт, мусиқа жиҳозлари ва бадиий адабиётлар билан таъминлаш, пандемия даврида мактабларни санитария-гигиена воситалари билан таъминлашда маҳаллий бюджет ҳамда ҳомийлар ҳисобидан ажратилган маблағлар Хоразм вилоятида таълим сифати ва самарадорлигини ошишига хизмат қилмоқда.

Тадбир сўнгида вилоят ҳокими Ўзбекистон Республикаси Халқ таълими вазирлиги томонидан берилган эътибордан руҳланиб, бундан буён ҳам ёшларимизнинг таълим-тарбияси йўлидаги беминнат хизматларини давом қилдиришини билдирди.

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?