Мамлакатимизда Саломатликни тарғиб қилиш кунлари бошланди (Фото)

16:59 07 Сентябр 2018 Жамият
219 0
Фото: Соғлиқни сақлаш вазирлиги Ахборот хизмати

Аҳолининг тиббий билим ва тафаккурини юксалтириш, оилаларда соғлом турмуш тарзини шакллантириш, ҳар бир инсоннинг ўзи ва яқинлари саломатлиги учун масъуллигини ошириш мақсадида Соғлиқни сақлаш вазирлиги томонидан “Саломатликни тарғиб қилиш кунлари” ўтказилмоқда.

Айтиш жоизки, “касалликни даволашдан кўра унинг олдини олган афзал”, деган тамойил кейинги йилларда тиббиёт тизимида олиб борилаётган ислоҳотларнинг бош мезонига айланди. Ташкил этилган мазкур тадбир тиббиёт тизимида эришилаётган ютуқларни халқимизга кенг тарғиб этиш баробарида, замонавий тиббий имкониятлардан одамларнинг баҳрамандлигини оширишда ҳам муҳим қадам бўлмоқда. Ушбу тиббий-ижтимоий акция пойтахтимиз ва вилоятлардаги маданият ва истироҳат боғларида ўтказилмоқда. Яъни, маданият масканларига ҳордиқ чиқариш ва сайр қилиш мақсадида ташриф буюрган одамлар боғларда ташкил этилган тиббиёт павильонларига таклиф этилиб, тиббий кўрикка жалб этиляпти.

Фото: Соғлиқни сақлаш вазирлиги Ахборот хизмати

Соғлиқни сақлаш вазирлиги Ахборот хизмати томонидан “Халқ сўзи online“га маълум қилинишича, тиббий кўрикларни ўтказиш учун пойтахтимиздаги республика ихтисослаштирилган илмий-амалий тиббиёт марказлари ва вилоятлардаги етакчи тиббиёт муассасаларининг нуфузли мутахассислари, тиббиёт олий ўқув юртлари олимлари, малакали шифокорлар жалб этилгани халқимиз учун яна бир қулайликдир. Хусусан, аҳоли хирургия, неврология, урология, кардиология, травматология, педиатрия, акушер-гинекология, офтальмология каби соҳаларда ишлаётган олимлар ва етук мутахассислар кўригидан ўтиш имконига эга бўлмоқда. Тиббий кўрикни халқаро андозалар бўйича ташкил этиш учунпавильонлар УТТ, ЭКГ каби замонавий аппаратлар ва лаборатория таҳлил воситалари билан жиҳозлангани эътиборга молик.

Фото: Соғлиқни сақлаш вазирлиги Ахборот хизмати

Шунингдек, олимлар ва малакали шифокорлардан тузилган кўчма бригадалар чекка ҳудудларда истиқомат қилувчи кексалар, ногиронлар ҳолидан хабар олиб, улар хонадонларига ташриф буюрмоқда. Тиббий кўриклар натижасида стационар даволанишга муҳтож деб топилганларни тегишли тартибда туман, шаҳар, вилоят ва республика тиббиёт муассасаларида соғломлаштириш режалаштирилган.

Фото: Соғлиқни сақлаш вазирлиги Ахборот хизмати

 


Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?


Кўп ўқилганлар