Бугун Жанубий Корея Президенти Мун Чжэ Иннинг Россияга ташрифи бошланади. У сафар чоғида Россия Президенти Владимир Путин ва Бош вазир Дмитрий Медведов билан учрашади, Давлат думасида нутқ сўзлайди.

Бундан ташқари, жаҳон чемпионати доирасида Жанубий Корея ва Мексика ўртасида бўлиб ўтадиган ўйинни томоша қилади.

Бу Корея Республикаси раҳбарининг Россияга иккинчи бор келишидир, деб хабар берди РИА “Новости”.

Бу галги учрашув Корея ярим ороли ҳаётида рўй берган ўзгаришлар фонида бўлиб ўтади. Икки ҳафта олдин КХДР етакчиси Ким Чен Ин ва АҚШ Президенти Дональд Трамп ўртасида тарихий саммит ташкил этилгани, унда минтақадаги вазиятни тартибга солиш бўйича чора-тадбирлар қабул қилинган эди.

Путин ва Мун Чжэ Ин ўртасидаги музокаралар ҳам шу йўналишдаги навбатдаги қадамдир. Москва Корея ярим оролида тинчлик ўрнатиш тарафдори эканлигини бир неча бор таъкидлаган. Лекин мазкур жараён фақат АҚШ – КХДР ўртасидаги муҳокамалар билан чекланиб қолмаслигини билдирганди.

Икки давлат раҳбари, шунингдек, ўзаро ҳамкорлик бўйича қатор ҳужжатларни имзолаши кутилаяпти. Умуман олганда, бугун Мун Чжэ Ин учун Путин билан бирга ўтказадиган ишчи кунига айланади.

Жанубий Корея Президенти бундан олдин Россия билан икки томонлама алоқаларнинг “тўққизта кўприги” ҳақида тўхталиб ўтганди. У ўз ичига энергетика, юқори технологиялар, транспорт, саноат каби соҳаларни қамраб олади.

Путин ва Мун Чжэ Ин КХДР иштирокидаги уч томонлама музокараларни муҳокама қилиши ҳам режалаштирилган. Бу борадаги ҳамкорликнинг асосий жабҳаси “Ҳасан - Раджин” лойиҳасидир. Мазкур ташаббус Россия темир йўллари ва Шимолий кореялик шериклар томонидан амалга оширилиши мақсад қилинган. Унга кўра Россиянинг Ҳасан станцияси билан КХДРнинг Раджин станциясини боғловчи темир йўлни модернизация қилиш ва Раджин портидаги 3 та пирс(кемалар боғлаб қўйиладиган махсус жой)ни фойдаланишга топшириш назарда тутилган. Яна бир лойиҳа Россиядан Жанубий Кореяга газ қувури тортиб боришдир. Унинг бир қисми Шимолий Корея ҳудудидан ўтади.

Мун Чжэ Ин 23 июнь куни Ростов шаҳрида Жанубий Корея ва Мексика ўртасида ўтказиладиган футбол ўйинини ҳам бевосита стадионга бориб кўради.