ЖЧ-2018 мусобақасининг очилиш учрашувида Россия терма жамоаси Саудия Арабистони билан қарши баҳс олиб борди.
Учрашувда мезбонлар йирик — 5:0 ҳисобида ғалаба қозонди. Ўйиннинг 12-дақиқасида Юрий Газинский Александр Головиннинг узатмасидан гол киритиб, жамоасини олдинга олиб чиқди. 

Биринчи бўлим якунида Денис Черишев рақиб жарима майдони ичида қулай пасни қабул қилиб олди ва ҳимоячиларни чалғитган ҳолда жамоасининг иккинчи голини урди.

Иккинчи бўлим бошида майдон эгалари босимни бироз камайтиришди ва бу ўйин тезлигига ўз таъсири ўтказди. 71-дақиқада захирадан майдонга тушганига кўп бўлмаган Артём Дзюба боши билан дарвозани ишғол қилиб, ҳисобни 3:0 кўринишига олиб келди.
Ҳакам томонидан қўшиб берилган дақиқаларда Денис Черишев ва Александр Головин яна бир мартада гол киритиб, Россия терма жамоасининг 5:0 ҳисобидаги ғалабасини таъминлади.

Ушбу гуруҳдаги Миср ва Уругвай терма жамоалари ўртасидаги учрашув эртага, 15 июнь куни бўлиб ўтади. Ўйин Тошкент вақти 17:00 да бошланади.
Эртага “В” гуруҳида биринчи тур учрашувлари ҳам бўлиб ўтади. Жумладан, соат 20:00 да Марокаш — Эрон учрашуви бошланса, 23:00 да Испания — Португалия учрашувига старт берилади.