2019 йил 30 апрел куни соат 21:25 да Тошгўзар – Бойсун – Қумқўрғон темир йўлининг Оқработ – Чашмаиҳофизон темир йўл участкасининг 103 км.да (Оқработ стантсиясидан 8 км узоқликда) поезд ҳаракатининг ўнг томонида ер кўчкиси содир бўлди. Бу ҳақда “Ўзбекистон темир йўллари” Ахборот-таҳлилий медиа маркази хабар берди.

Ер кўчкиси пайтда ушбу участкадан №081-сонли Сариосиё – Тошкент йўналишдаги йўловчи поезди ҳаракатланаётган эди ва поезднинг 3 та вагони ҳаракатдан тўхтади. Мазкур поезд ишчи-ходимлари (бригадаси) томонидан ўз вақтида амалга оширилган тезкор саъй-ҳаракат туфайли барча йўловчилар поезднинг қолган вагонларига кўчирилди ва жойлаштирилди.

Қайд этиш жоиз, мазкур ҳолатда жабрланганлар йўқ. Барча буюм ва ҳужжатлар ўз эгаларига етказилди.

Соат 22:10да №081-сонли поезд “Деҳқонобод” станциясига етиб келди. У ерда йўловчи поезди тўлиқ техник кўрикдан ўтказилди, шунингдек йўловчиларни жойлаштириш мақсадида қўшимча иккита вагон уланди. Сариосиё – Тошкент йўналишдаги йўловчи поезди ўз манзилига етиб борди.

Ҳозирги вақтда шикастланган темир йўлнинг устки қисми тўлқ тикланиб пўлат излари тикланди ва юк ташиш ва йўловчи поездларнинг ҳаракатланиши белгиланган тартибда йўлга қўйилган.

Кўчки содир бўлган ҳудуд ”Ўзбекистон темир йўллари” АЖ ходимлари томонидан назоратга олинган.

ИЗОҲ: Оммавий ахборот воситаларида тарқатилаётган фотосуратларда пўлат изларининг қайта тиклаш жараёни акс эттирилган.