Шу кунларда Миср давлатининг бир қатор нуфузли компаниялари раҳбарларидан иборат делегация Қарши шаҳрида меҳмон бўлиб турибди, деб хабар берди вилоят мухбиримиз Аҳад Аҳад Муҳамадиев. 

Ўзбекистон Республикасининг Миср Араб Республикасидаги фавқулодда ва мухтор элчиси Ойбек Усмонов бошчилигидаги 14 кишидан иборат делегация аъзолари иштирокида дастлаб маҳаллий тадбиркорлар билан учрашув ўтказилди. Музокаралар давомида  вилоятда фармацевтика, саноат, хизмат кўрсатиш, қурилиш материаллари ишлаб чиқариш каби соҳаларда инвестициявий лойиҳаларни татбиқ этиш борасидаги фойдали битимлар ҳақида келишиб олинди.  

Хусусан, Қарши шаҳридаги “Дори Дармон” ДУК билан  Миср давлатинниг “One World Pharma” компанияси ҳамкорлигида “One world Kashdarya” қўшма корхонасини ташкил этиш юзасидан келишувлар олиб борилди. Ушбу лойиҳа доирасида гепатит С касаллигини олдини олиш ва унга қарши курашиш учун дори воситалари ишлаб чиқариш кўзда тутилмоқда. Лойиҳага дастлабки босқичда 5 млн. АҚШ доллари йўналтирилади. Шундан 3,5 млн. доллари хорижий инвестиция бўлиши кутиляпти.

Учрашувда Қашқадарё саноат салоҳияти, ҳудуддаги мавжуд бой ер усти ва ер ости бойликлари, улардан самарали фойдаланиш бўйича амалга оширилаётган истиқболли лойиҳалар ҳақида иштирокчиларга маълумотлар берилди. 

Таъкидланганидек, хорижлик инвесторлар билан олиб борилаётган ҳамкорлик алоқалари вилоят тадбиркорлари учун қатор имконият ва имтиёзлар яратмоқда. 

Маълумот ўрнида айтиш мумкинки, 2019 йилнинг ўтган даври мобайнида вилоятга 140 дан ортиқ инвесторлар ташриф буюрди ва улар билан бир қатор самарали келишувларга эришилди.