Попда парашют спорти секцияси очилди

14:45 05 Июль 2019 Спорт
647 0

Фото: Ҳотам Мамадалиев.

Ўзбекистон мудофаасига кўмаклашувчи “Ватанпарвар” ташкилоти Наманган вилояти кенгаши тасарруфидаги Поп тумани ўқув-спорт техника клуби қошида вилоятдаги илк парашют спорт секцияси иш бошлади.

Шу муносабат билан ўтказилган маросимда Ўзбекистон мудофаасига кўмаклашувчи “Ватанпарвар” ташкилоти вилоят кенгаши раиси Аҳмаджон Аълохўжаев Давлатимиз раҳбарининг 2018 йил 12 декабрдаги “Ёшларни ватанпарварлик руҳида ва жисмоний тарбиялаш ҳамда чақирилувчиларни ҳарбий-техник мутахассисликлар бўйича тайёрлаш тартибини такомиллаштириш бўйича қўшимча чора-тадбирлар тўғрисида”ги қарори ижроси доирасида вилоятнинг чекка ҳудудида ташкил этилган мазкур спорт секцияси фуқароларнинг мазкур спорт турига қизиқишини шакллантиришга хизмат қилишини таъкидлади.

Тадбирда ҳарбийлар томонидан парашютда сакраш бўйича кўргазмали чиқишлар ташкил этилди. Наманганлик ёш конструкторлар томонидан тайёрланган ракета моделлари тақдимоти ўтказилди.

Маълумот учун, парашют спорти билан шуғулланиш имкони берувчи вилоятдаги илк спорт секцияси парашют тизимлари, зарур анжом ва тренажерлар, шунингдек, ўқув-методик ва кўргазмали қуроллар билан тўла жиҳозланган. Бу ерда 17 метрлик парашютдан сакраш минораси ҳам барпо этилди.

Қудратилла НАЖМИДДИНОВ, “Халқ сўзи”.

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?