Бугун қитъамизнинг бир қатор яшил майдонларида Осиё чемпионлар лигасининг гуруҳ баҳсларига чиқиш учун саралаш босқичининг сўнгги ўйинлари бўлиб ўтади.

Хусусан, Шарқ ва Ғарб минтақасига бўлинган ҳолда ташкил этилаётган беллашувларда юртимизнинг икки жамоаси — “Пахтакор” ва “ОКМК” ҳам ўз ўйинларини сафарда ўтказишади.

Олмалиқ шаҳрининг “ОКМК” клуби Саудия Арабистонининг кучли жамоаларидан бири “Ан-Наср”га қарши баҳс олиб боради. 1955 йил Ар-Риёд шаҳрида тузилган “Ан-Наср” клуби ўтган йил ўз чемпионатида бронза медалини қўлга киритган. Ушбу жамоани бугунги кунда португалиялик Руи Витория бошқариб бормоқда. Жамоа сафида ҳимоячи Майкон Роке (Бразилия), ярим ҳимоячи Жулиано (Бразилия), Абдулраззоқ Ҳамдаллаҳ (Марокаш) ва дарвозабон Брэд Жонс (Австралия) каби легионерлар бор.

Мамлакатимизнинг кўп карра чемпиони “Пахтакор” эса Бирлашган Араб Амирликларининг “Ан-Наср” жамоаси билан ўзаро ҳисоб-китоб қилади. 1945 йилда ташкил этилган мазкур футбол клуби бугунги кунга қадар 3 марта БАА чемпиони бўлган. Айни пайтда жамоани испаниялик мураббий Беньят Сан Хосе бошқариб бормоқда. Мураббий Осиё чемпионлар лигаси учун тўрт нафар легионерни рўйхатдан ўтказди. Булар ҳимоячи Жон Умари (Ливан), ҳужумчилар Ронни Аллан Фернандез (Чили), Альваро Негредо (Испания) ва Серхио Дутра Жуниор (Бразилия).

Кўриб турганингиздек, иккала жамоамиз ҳам жиддий рақибларга қарши куч синашади. Учрашувлар Тошкент вақти билан соат 20:00 да бошланади. Олинган маълумотларга кўра, “Спорт” телеканали “Ан-Наср” — “ОКМК” баҳсини жонли равишда эфирга узатади. “Пахтакор” иштирокидаги ўйин ёзиб олинган ҳолда намойиш этилади.