“Ўзбеккино” Миллий агентлиги кинотеатрлар монополиясига нуқта қўйдими?

10:25 14 Сентябр 2018 Маданият
1036 0

Иллюстратив фото

Ўзбекистон Республикаси Президентининг 2018 йил 24 июлдаги “Миллий киноиндустрияни ривожлантириш бўйича қўшимча чора-тадбирлар тўғрисида”ги қарори ҳамда Вазирлар Маҳкамасининг 2018 йил 6 апрелдаги “Республикада ягона репертуар сиёсати юритилишини таъминлашга йўналтирилган республика кинопрокат тизимини ташкил этиш чора-тадбирлари тўғрисида”ги қарорига мувофиқ “Ўзбеккино” Миллий агентлиги тизимда бир қатор ўзгаришларни амалга оширмоқда.

Улардан энг асосийси “Республика кинопрокат маркази” ва уларнинг республиканинг барча ҳудудларидаги филиалларининг ташкил этилиши бўлди. Ушбу марказ олдига бир қатор масалалар қўйилганки, уларнинг ечими кинопрокат соҳасидаги мавжуд муаммоларни ҳал этишда асосий омил бўлиб хизмат қилади.

“Республика кинопрокат маркази” олдида, энг аввало, экранларимизга чиқарилаётган фильмларнинг прокатини қайта жонлантириш, кино маҳсулотларини мамлакатимизнинг барча нуқталарига ўз вақтида етказиб бериш, муносиб ижод намуналарини жаҳон кино бозорларига тақдим этиш ва уларда фаол иштирок этиш каби бошқа муҳим вазифалар турибди.

Бугун ушбу тизимда кўп йиллик анъаналарни бузган, “оламшумул” бир янгилик содир бўлди. Яъни, бундан буён киностудияларнинг мамлакатимиздаги давлат тасарруфида бўлган мавжуд кинотеатрлар билан тўғридан-тўғри алоқалари тугатилди. “Ўзбеккино” Миллий агентлиги бош директори Фурқат Зокировнинг “Республикада ягона репертуар сиёсати юритилишини таъминлашга йўналтирилган республика кинопрокат тизимини ташкил этиш бўйича қўшимча чора-тадбирлар тўғрисида”ги буйруғига кўра:

бундан буён Агентлик тизимидаги барча кинотеатрларни миллий ва хорижий фильмлар билан таъминлаш марказлашган ҳолда “Республика кинопрокат маркази” томонидан амалга оширилади;

кинопрокат тизимига кирувчи барча кинотеатрларда фильмлар намойишини ташкил этиш хусусий кино ишлаб чиқарувчилар (студиялар) ва дистрибьютерлар билан тузиладиган шартномалар асосида “Республика кинопрокат маркази” томонидан амалга оширилади.

Эндиликда кинопрокат тизимига кирувчи Агентлик тизимидаги ва бошқа кинотеатрларда “Республика кинопрокат маркази” билан прокат шартномалари тузилмаган ва репертуар режага киритилмаган фильмлар намойишини амалга ошириш мумкин эмас.

Агентлик тизимидаги “Алишер Навоий номидаги киносаройи”га (Тошкент шаҳри) ва “Шарқ юлдузи кинотеатри”га (Самарқанд шаҳри), “Алишер Навоий номли кинотеатр” (Фарғона шаҳри) қарашли бўлган барча кино афиша стендлари ягона репертуар сиёсати юритилишини таъминлаш учун оператив бошқарув асосида “Республика кинопрокат маркази” ихтиёрига ўтказиб берилади ва улар замонавий электрон стендларга босқичма-босқич алмаштирилади.

Шу билан бирга, тизимда шаффофликни таъминлаш мақсадида кинотеатрлар оптик толали алоқа линияси орқали кинопрокат электрон тармоғига уланади ва уларда электрон кино чипталарни юритиш автоматлаштирилган тизими жорий қилинади.

Ўзбек киносининг сифати ва савияси ҳақида гап кетганда тилга олинадиган асосий муаммолардан бири – фильмларнинг мавзусидан тортиб, жанригача, давомийлигидан тортиб, то унда кимларнингдир буюртма асосида “тезда машҳурликка эришиш” учун асосий ролларни ижро этиши ва репертуар сиёсатини белгилаши шу кунга қадар айрим киностудиялар ва монопол кинотеатрлар қўлида бўлганлиги сабабли келиб чиққанини назарда тутадиган бўлсак, демак энди ўзбек киносида янги давр бошланаётганига ишонгимиз келади.


Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?


Кўп ўқилганлар

Afisha

Президент топшириқлари қандай бажарилмоқда? Мутасаддилар жавоб берадилар

Ёдингизда бўлса, Президентимиз жорий йил 11 январь куни халқ депутатлари Самарқанд вилояти Кенгашининг навбатдан ташқари сессиясида туман ва шаҳар фаоллари мурожаатларини тинглар экан, улар кўтарган муаммоли масалаларни қисқа муддатда ҳал этиш юзасидан мутасаддиларга тегишли топшириқ ва кўрсатмалар берган эди.

05 Февраль 2019