Хабарингиз бор, 2018 йилнинг 17-18 август кунлари Ўзбекистон Республикаси Президенти Шавкат Мирзиёевнинг таклифига биноан Тожикистон Республикаси Президенти Имомали Раҳмон давлат ташрифи билан мамлакатимизда бўлди.

Бўлиб ўтган музокараларда Ўзбекистон ва Тожикистон раҳбарлари, халқаро ва минтақавий сиёсатнинг долзарб масалалари юзасидан фикр алмашдилар. Музокаралар якунида икки томонлама ҳужжатлар имзоланди.

Адлия вазирлиги Жамоатчилик билан алоқалар бўлими маълумотига кўра, ўзаро ҳурмат ва ишонч руҳида ўтган учрашувда турли соҳалардаги икки томонлама ҳамкорликни кенгайтириш, ўзбек ва тожик халқлари ўртасидаги анъанавий қардошлик алоқаларини мустаҳкамлашга қаратилган салмоқли давлатлараро, ҳукуматлараро ва идоралараро жами 26 ҳужжат имзоланди.

Ушбу сиёсий жараёнларда Ўзбекистон Республикаси Адлия вазири Русланбек Давлетов ҳам иштирок этди. Бўлиб ўтган учрашув давомида ҳар икки давлатнинг Адлия вазирликлари ўртасида ҳамкорлик тўғрисида ҳам битим имзоланди. Мазкур ҳужжат давлатлараро адлия соҳасидаги ўзаро ҳамкорликни янада ривожлантиришга қаратилганлиги билан аҳамиятлидир.

Ҳамкорлик битими адлия соҳасида давлат сиёсатини шакллантириш ва уни амалга ошириш, адлия идоралари,нотариуслар ва адвокатлар фаолиятини ташкил этиш, адлия органларига реестрлар киритиш ва ҳужжатларни рўйхатдан ўтказиш, адлия органлари учун кадрлар тайёрлаш ва алмашиш, шунингдек, малакасини ошириш, криминалистика ва суд экспертизаси соҳасида илмий тадқиқот ишларини олиб бориш каби йўналишларни қамраб олган.