2018 йилнинг 14 май куни АҚШ пойтахти Вашингтон шаҳрида Атлантика кенгаши ва АҚШ ташқи сиёсати бўйича Марказий Осиё ва Кавказ институти томонидан “Ўзбекистон томон очилиш: Президент Шавкат Мирзиёев ташрифига дастлабки назар” мавзусида тадбир ўтказилади. 

Шу муносабат билан Атлантика кенгаши сайтида шундай ёзилади: “Жорий йилнинг май ойида Ўзбекистон Президенти Шавкат Мирзиёев АҚШ Президенти Дональд Трамп таклифига биноан Вашингтон шаҳри, Колумбия округига келади. Президент Мирзиёев раҳбарлигидаги янги ҳокимият Ўзбекистонни халқаро ҳамкорлик ва тўғридан-тўғри хориж инвестицияларига очиб бериш учун сиёсий ва иқтисодий ислоҳотларини эълон қилди. Тошкентнинг янги минтақавий сиёсати чегара демаркацияси, сув ресурсларидан оқилона фойдаланиш, экстремизм ва терроризм, шунингдек, Афғонистонда тинчлик ўрнатиш каби эски масалалар ечими учун шиддат ҳамда истиқбол бахш этди. 

Атлантика кенгаши ва АҚШ ташқи сиёсати бўйича Марказий Осиё ва Кавказ институти Президент Шавкат Мирзиёевнинг Оқ уйга ташрифини, шунингдек, АҚШ ва Ўзбекистон ўртасидаги алоқалар истиқболлари, янада кенг миқёсдаги халқаро ҳамда минтақавий масалалар, минтақадаги умумий барқарорликни муҳокама қилиш ва баҳолаш учун гуруҳ йиғмоқда”.

Мазкур анжуманда Ўзбекистон Республикаси Сенати Раисининг биринчи ўринбосари Содиқ Сафоев, Инсон ҳуқуқлари бўйича Ўзбекистон Республикаси Миллий маркази директори, Олий Мажлис Қонунчилик палатаси қўмита раиси Акмал Саидов, Ўзбекистон Республикаси Президентининг Афғонистон бўйича махсус вакили Исматулла Эргашев, Ўзбекистон Республикаси Ташқи ишлар вазирлиги ҳузуридаги Халқаро муносабатлар ахборот-таҳлил маркази директори Элдор Арипов меҳмон делегация вакиллари сифатида иштирок этиши режалаштирилган.

Мезбонлардан эса АҚШ Президенти маслаҳатчиси ўринбосари, Миллий хавфсизлик кенгашининг Жанубий ва Марказий Осиё бўйича катта директори Лиза Кёртис, Марказий Осиё ва Кавказ институти, Буюк ипак йўлини ўрганиш дастури асосчиси ва директори Фредерик Старр қатнашиши белгиланган.
Тадбирга АҚШнинг Ўзбекистондаги собиқ элчиси, Атлантика кенгашининг Евроосиё маркази директори Жон Хербст модераторлик қилади.