“Обод маҳалла”: дастур ижроси фақат қурувчиларга тааллуқли эмас

14:01 06 Сентябр 2018 Жамият
463 0
Фото: Аҳмадали Шерназаров / "Халқ сўзи"

Аҳмадали Шерназаров, “Халқ сўзи online”/Сирдарё. Бунга эса гулистонлик уч нафар ёш рассомнинг ибратли ташаббусини мисол келтириш мумкин.

Гап шундаки, ёзги таътилда Ўзбекистон Бадиий академияси тасарруфидаги Сирдарё вилояти ихтисослаштирилган санъат мактаб-интернати ўқитувчилари Одилжон Аҳмедов, Ғанишер Норматов ва Тоҳир Раҳмонбердиев Гулистон шаҳридаги “Обод юрт” маҳалласидаги бино деворига биргаликда “Сардоба” асарини чизиб бердилар.

Ва бу қадимда Мирзачўл орқали ўтган карвон йўлидаги, Сардоба тумани ҳудудида ҳозиргача сақланиб қолган тарихий ёдгорликни акс эттирувчи маҳобатли асар ёш мусаввирларнинг мазкур маҳаллада амалга оширилган “Обод маҳалла” дастури ижросига қўшган муносиб совғаси бўлди.

Фото: Аҳмадали Шерназаров / "Халқ сўзи"

“Обод қишлоқ”, “Обод маҳалла” дастури асосида ҳудудларнинг чирой очаётганлиги биз ижодкорларга ҳам илҳом бахш этмоқда. Айни чоғда ушбу завқланиш бизда бу хайрли ишга ўзимизнинг беминнат ҳиссамизни қўшиш истагини ҳам пайдо қилди. Гулистон шаҳридаги “Обод юрт” маҳалласининг қоқ марказида яратган асаримиз ана шу ниятимизнинг ижобати бўлди. Биз чизган сурат рўпарасига расм мазмунига жуда ҳамоҳанг тарзда фаввора қурилди. Натижада одамларда ўтмишдаги сув эҳтиёжи йўлидаги машаққат ва бу борадаги ҳозирги қулай шароит ҳақида тасаввур уйғотадиган манзара юзага келди" , - дейди Одилжон Аҳмедов. 

Бинобарин, “Обод маҳалла” дастури ижроси доирасида мазкур маҳаллада кенг кўламдаги ишлар амалга оширилди. Ҳудуднинг аввалги абгор аҳволи ўрнида покиза, саранжом–саришта, обод ва кўркам, йўллари равон, дарахт ва гулларга бурканган сўлим хиёбон, ҳавас қилса арзигулик бир гўша пайдо бўлди.


Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?


Кўп ўқилганлар