Қозоғистон сенати (юқори палата) “Қозоғистон Республикаси Хавфсизлик кенгаши тўғрисида”ги қонунни қабул қилди. Унга кўра мамлакат президенти Нурсултон Назарбоев ўз мамлакати Хавфсизлик кенгашига умрбод раҳбарлик қилади, деб ёзмоқда ТАСС.

Янги ҳужжатга кўра Қозоғистон Хавфсизлик кенгаши ички сиёсий барқарорликни сақлаш, конституциявий тузум, республика мустақиллиги, ҳудудий яхлитлиги ва халқаро майдонда миллий манфаатларини ҳимоя қилиш мақсадида "Қозоғистоннинг миллий хавфсизлиги ва мудофаа қобилиятини таъминлаш соҳасида ягона давлат сиёсатини амалга оширишни мувофиқлаштиради".

Қонунда Қозоғистон Хавфсизлик Кенгашига мувофиқлаштирувчи конституцион орган мақоми берилди. Қозоғистон Адлия вазири Марат Бекетаевнинг изоҳлашича, «Хавфсизлик Кенгаши тўғрисида» ги қонун «Президент тўғрисида»ги Конституциявий қонуннинг 33-моддасига мувофиқ ишлаб чиқилган. Ҳужжатда Хавфсизлик Кенгашининг ҳуқуқий мақоми ва ташкилот ваколатлари белгилаб қўйилган.

Жорий йилнинг феврал ойида Қозоғистон адлия вазири президент Назарбоевнинг мамлакат Хавфсизлик кенгашига умрбод раҳбарлик қилиш ҳуқуқи ўтган 2017 йилдаги конституциявий ислоҳотлар доирасида қабул қилинганлигини маълум қилган эди. 

Сенат маъқуллагандан сўнг “Қозоғистон Республикаси Хавфсизлик кенгаши тўғрисида”ги қонун тўлиқ қабул қилинган ҳисобланади ва давлат раҳбарига имзо чекиш учун жўнатилади.