Фото: Ўзбекистон Республикаси Президентининг Матбуот хизмати.

Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигининг “Телеграмм” ижтимоий тармоғидаги https://t.me/aimcuz расмий каналида маълум қилинишича, Агентлик Намангандаги Нодирабегим номидаги ахборот-кутубхона маркази биноси ва у жойлашган ҳудудни реконструкция қилиш, ахборот-кутубхона марказини тубдан модернизациялаш бўйича кенг қамровли лойиҳа тайёрлаган.

Наманган шаҳрида жойлашган, Нодирабегим номидаги мазкур ахборот-кутубхона маркази ташкил топганига бу йил 100 йил тўлди. 570 мингдан ортиқ китоб фондига эга ушбу зиё маскани барча ахборот-ресурс марказларига услубий кўмак бериб келмоқда.

Кутубхонада қулай шарт-шароит яратиш, китобхонларга замонавий андазаларда хизмат кўрсатишга эришиш замон талабига айланган.

Агентлик томонидан тайёрланган лойиҳа асосида эндиликда бу зиё мажмуаси:

— мамлакатимиз нашриётларида чоп этилаётган китоблар ва чет эл ёзувчиларининг асарлари билан янада бойитилади;

— бу ерда замонавий телекоммуникациялар ёрдамида масофадан туриб мамлакатимиз ва илғор хорижий давлатлар кутубхоналаридаги ресурслардан фойдаланиш имконияти, китобхонларга билим ва ахборот олишлари учун шинам шароит яратилади;

— ўқув ҳамда анжуманлар заллари кўркам ва бежирим кўринишга эга бўлади.

Қисқача айтганда, кутубхона ҳозиргидан икки баробар кўп фойдаланувчига хизмат кўрсата оладиган даражага етказилади.

Президент Шавкат Мирзиёев Наманган вилоятига ташрифи чоғида мазкур лойиҳа билан танишар экан, уни қўллаб-қувватлашини, жумладан, ушбу маънавий қимматга эга лойиҳани қисқа муддатда амалга ошириш лозимлигини таъкидлади. Шунингдек, қарийб ярим гектарга тенг майдонда жойлашган кутубхона тевараги китоб мутолаасига қулай ва осойишта бўлиши лозимлигини қайд этди.