Халқ таълими вазирлиги ҳузурида эксперт-таҳлил кенгаши ташкил қилинди ва унга раис тайинланди

09:41 31 Июль 2018 Жамият
418 0
Фото: uzedu.uz

Жорий йилнинг 27 июль куни Халқ таълими вазирлигида эксперт-таҳлил кенгашининг биринчи сессияси бўлиб ўтди. Унда таълимнинг аҳамиятини оширишдаги асосий мақсадлар ва кенгашнинг мақсад ва вазифалари муҳокама қилинди. Халқ таълими вазири Ш.Шерматов билан бўлган учрашувда кенгаш вакиллари Х.Сулаймонова (Davinci), В.Кан (MYWAY), М.Қосимов (Ambit), Х.Мамасаидов (Dekos.uz), В.Ким (Study Smart Project), А.Юсуфов (lebazar.uz), Л.Пўлатов (Premium Parts)лар иштирок этишди.

Вазирлик матбуот хизматининг маълум қилишича, эксперт-таҳлил кенгаши вазирлик билан ўқувчилар, уларнинг ота-оналари, давлат ва хусусий мактаблар маъмурияти, ўқитувчилари, шунингдек, бошқа таълим муассасалари ўртасида ўзаро ҳамкорликни таъминлаш мақсадида ташкил этилмоқда.

Таъкидлаш жоизки, Эксперт-таҳлил кенгаши консультатив-маслаҳат органи бўлиб, ўз фаолиятини жамоатчилик асосида олиб боради, унинг асосий вазифаларидан бири Халқ таълими вазирлиги фаолияти устидан жамоатчилик назоратини амалга оширишдир.

DaVinci Management Consulting асосчиси ва ҳамкор бошқарувчиси Ҳилола​ Сулаймонова бир овоздан Эксперт-таҳлил кенгаши раиси этиб сайланди. Сулаймонова, шунингдек, Zarplata.uz стартапи асосчиси, муваффақиятли бизнес-тренер, мотивацияли маърузачи, инсон капиталини ривожлантириш соҳаси бўйича 12 йиллик иш тажрибасига эга бизнес консультант ҳисобланади. Ҳилола моҳир бошқарувчиларни топиш, иқтидорларни жалб қилиш ва ривожлантириш ҳамда HR (human resource management) бошқаруви соҳасида кўп йиллик тажрибага эга экспертдир.

Учрашув якунларига кўра мактаблар ҳолатини батафсил таҳлил қилиш,замонавий ўқув дастурларини яратиш бўйича стратегияларни ишлаб чиқиш, мактаб ўқувчиларида ижодий фикрлашни ривожлантиришга қаратилган қўшимча тўгараклар ва спорт секциялари яратишни бошлаш бўйича қарор қабул қилинди. Томонлар халқ таълими тизимини такомиллаштириш йўлида яқин ҳамкорликка тайёр эканликларини билдиришди.


Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?


Кўп ўқилганлар