“Job Cafe” мобил иловаси нега яратилди?

13:40 15 Февраль 2019 Жамият
392 0

Яқинда “Job Cafe” мобил иловасининг демо варианти тақдимоти ва ушбу лойиҳани амалга ошириш механизмларини амалга ошириш бўйича давра суҳбати ўтказилди. Бу ҳақда Инновацион ривожланиш вазирлиги матбуот хизмати хабар берди.

Инновацион ривожланиш вазирлиги қошидаги Илғор технологиялар марказининг Тижоратлаштириш ва технологиялар трансфери бўлимининг етакчи мутахассиси Рустам Иброҳимов ўзи яратган “Job Cafe” мобил иловаси ҳақида қуйидагиларни гапириб берди:

– Мазкур илова мобил телефони орқали ишлайди. Унда кунлик иш қидираётган фуқаролар рўйхати шакллантириб борилади. Рўйхатлар иш қидирувчилар ҳамда ҳудудий агентлар, ягона дарча, сall centre операторлари ёрдамида тузилиши назарда тутилган бўлиб, кунлик иш қидираётган фуқаролар ҳақидаги маълумотлар шаффофлиги таъминланади. Бу ўз навбатида ҳам бир марталик иш берувчиларга, ҳам бир марталик иш қидирувчиларга ҳам қулайлик туғдиради.

Илова фақатгина бир марталик иш қидирувчиларни иш билан таъминлаб, бир марталик юмушини амалга ошириш учун иш кучи ёллаган фуқароларнинг талабларини қондириш билан чегараланиб қолмаслиги лойиҳа муаллифлари томонидан алоҳида таъкидланди. Лойиҳа иш қидирувчилар, дейлик, ҳар уч ойда бир маротаба шифокор кўригидан ўтишлари, ҳар бир иш қидирувчига алоҳида ID карта очилиши ёки QR код берилиши, уларнинг ижтимоий муҳофаза қилиниши каби масалаларни ҳал этишга қаратилган. Лойиҳа бир марталик иш қидирувчиларнинг ҳуқуқлари бузилмаслигининг олдини олишга, ҳақ-ҳуқуқлари муҳофаза қилинишига хизмат қилади. Хизматчиларнинг бир марталик шартнома билан хизмат кўрсатишлари ишчи ва иш берувчи ўртасида юзага келиши мумкин бўлган низоларни ҳал қилишга асос бўлади. Бундан ташқари, ҳар бир ишчи/хизматчи учун меҳнат дафтарчасининг очилиши ва фуқароларнинг истагига кўра маълум миқдордаги маблағларнинг тегишли давлат идораларига ўтказилиши кейинчалик уларнинг пенсия таъминотига ижобий таъсир кўрсатишига замин яратади.

Илова муаллифи ҳозирда мавжуд бўлган ижтимоий тармоқлардаги иш қидириш гуруҳлари, турли сайтлардан фарқи , унинг айнан муайян малакага ва касбий кўникмаларга эга бўлмаган шахслар учун мўлжалланганлигини қайд этди. Мазкур лойиҳа бугунги кунда “мардикорлар” атамаси билан тилга олинадиган ижтимоий қатламнинг манфаатлари учун хизмат қилади. Ўз навбатида, бир марталик иш қидирувчилар хизматларидан фойдаланаётган фуқаролар ҳам нотаниш одамлар томондан амалга оширилиши мумкин бўлган ноқонуний ҳаракатлардан ҳимояланадилар.

Лойиҳа Ўзбекистон Республикаси Бандлик ва меҳнат муносабатлари вазирлиги, Ички ишлар вазирлиги, Хотин-қизлар қўмитаси, Молия вазирлиги ҳузуридаги Бюджетдан ташқари Пенсия жамғармаси, Соғлиқни сақлаш вазирлиги, Ёшлар иттифоқи ва бошқа манфаатдор идора ва муассасалар билан ҳамкорликда амалга оширилиши кутилмоқда.

Айни кунларда мобил иловани мукаммаллаштириш ва жорий этиш масаласи Инновацион ривожланиш вазирлигининг Жамият қурилишига инновацияларни жорий этиш бўлими билан ҳамкорликда амалга оширилмоқда.


Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?


Кўп ўқилганлар

Afisha

Президент топшириқлари қандай бажарилмоқда? Мутасаддилар жавоб берадилар

Ёдингизда бўлса, Президентимиз жорий йил 11 январь куни халқ депутатлари Самарқанд вилояти Кенгашининг навбатдан ташқари сессиясида туман ва шаҳар фаоллари мурожаатларини тинглар экан, улар кўтарган муаммоли масалаларни қисқа муддатда ҳал этиш юзасидан мутасаддиларга тегишли топшириқ ва кўрсатмалар берган эди.

05 Февраль 2019