2018 йилнинг дастлабки етти ойида Ўзбекистонда 277та қотиллик жинояти қайд қилинган. Бу ҳақда Олий Мажлиси палаталари Кенгашларининг кенгайтирилган қўшма мажлисида маълум қилинди, дея хабар бермоқда “Халқ сўзи“ мухбири Қобил Хидиров.

Қайд қилинишича, қотиллик жинояти аксарият ҳолларда оила-турмуш ва қўни-қўшничилик билан боғлиқ муаммолар оқибатида юз бермоқда.

Жорий йилнинг 7 ойида 277 та қотиллик жиноятининг 116 таси ёки 42 фоизи қариндошлар, 25 таси ёки 9 фоизи қўни-қўшнилар ўртасида содир этилган. Мазкур жиноятларнинг 95 таси ёки 34,2 фоизи эр-хотин, ака-ука, ота-ўғил ўртасида рўй берган.

Мажлисда келтирилишича, Чирчиқ шаҳрида яшовчи Иргашев уйида отаси билан спиртли ичимлик истеъмол қилиб, ўрталарида келиб чиққан жанжал оқибатида ўз отасини бўғиб ўлдирган.

Баъзи ҳудудларда жиноят-қидирув йўналишидаги айрим жиноят турларининг сони ортган. Жумладан Андижон, Сурхондарё, Тошкент, Фарғона, Жиззах вилоятларида ва Қорақалпоғистон Республикасида қасддан одам ўлдириш, Андижон, Сурхондарё вилоятлари ва Қорақалпоғистон Республикасида оғир тан жароҳати етказиш, Жиззахда босқинчилик, Наманган, Жиззах ва Қорақалпоғистон Республикасида транспорт воситаларини олиб қочиш жиноятлари кўпайган.