Хабарингиз бор Ўзбекистон истеъмолчилар ҳуқуқларини ҳимоя қилиш жамиятлари федерацияси делегацияси Россия Федерациясида хизмат сафарида. Истеъмолчилар ҳуқуқларини ҳимоя қилиш борасида ҳамкорлик масалаларига бугун федерация алоҳида эътибор қаратмоқда. Шу маънода истеъмолчилар ҳуқуқини ҳимоя қилиш ва инсон манфаатлари соҳасини назорат қилиш бўйича федерал хизмати (Роспотребнадзор) раҳбарияти ўртасида ўзаро ҳамкорлик масалалари юзасидан учрашув ўтказилди.

Учрашувда, Ўзбекистон истеъмолчилар ҳуқуқларини ҳимоя қилиш жамиятлари федерацияси ҳамда Россия Федерацияси истеъмолчилар ҳуқуқини ҳимоя қилиш ва инсон манфаатлари соҳасини назорат қилиш бўйича федерал хизмати (Роспотребнадзор) ўртасида истеъмолчилар ҳуқуқларини ҳимоя қилиш ва истеъмолчиларнинг транс-чегара шикоятларини кўриб чиқиш соҳасида ҳамкорлик масалалари, туризм соҳасида икки давлат фуқароларининг ҳуқуқ ва қонуний манфаатларини ҳимоя қилиш, сайёҳларни тўлақонли ахборот билан таъминлаш, уларнинг истеъмолчи сифатидаги ҳуқуқларининг бузилишини олдини олиш ҳамда ўзаро тажриба алмашиш масалалари юзасидан фикрлар алмашилди. Бугунги кунга қадар Ўзбекистон Истеъмолчилар ҳуқуқларини ҳимоя қилиш федерацияси Халқаро истеъмолчилар конфедерациясига аъзо бўлди, Жанубий Корея истеъмолчилар агентлиги, Ҳиндистон Истеъмолчилар ассоциацияси, Озарбайжон озод истеъмолчилар иттифоқи, Туркия истеъмолчилар ҳуқуқлари ассоциацияси, Қозоғистон истеъмолчилар ташкилоти, Тожикистон истеъмолчилар иттифоқи каби қатор халқаро ташкилотлар билан ҳамкорлик қилиб келмоқда. Россиянинг истеъмолчилар ҳуқуқини ҳимоя қилиш ва инсон манфаатлари соҳасини назорат қилиш бўйича федерал хизмати (Роспотребнадзор) билан ҳамкорликни йўли қўйилиши эса истеъмолчилар ҳуқуқларини ҳимоя қилиш борасида улкан қадамлардан биридир.Ҳамкорлигимиз географиясининг кенгаяётгани нафақат Ўзбекистонда балки бошқа давлатларда ҳам фуқароларимизни истеъмолчи сифатида ҳуқуқларини ҳимоя қилиш ва кафолатлашга асос бўлиб хизмат қилади.