Иллюстратив фото

Фарғона вилоятида давлат солиқ хизмати органлари ходимлари вилоят ҳуқуқни муҳофаза қилиш органлари билан ҳамкорликда ноқонуний равишда фаолият юритаётган “устаси фаранглар”ни аниқлаш юзасидан назорат тадбирлари ўтказишмоқда. Бу ҳақда ДСҚ матбуот хизмати хабар берди.

Ёзёвон туманида ўтказилган тадбир давомида, Юқори сойбўйи маҳалла фуқаролар йиғинида истиқомат қилувчи О.С.нинг хонадонида дизель ёқилғиси ноқонуний равишда сақланаётганлиги аниқланди.

Маълум бўлишича, ушбу фуқаро ҳажми 1,6 тонна сиғимга эга темир цистернада 1500 литр дизель ёқилғиси ҳамда 7 дона ҳар бири 20 литрдан бўлган маҳсус елим идишларда 140 литр дизель ёқилғиси ноқонуний тарзда сотиш учун сақлаб келган.

Назорат тадбири натижасида қонунбузарнинг 9 миллион сўмлик дизель ёқилғиси маҳсулоти, 2,5 миллион сўмлик цистерна, 1,2 миллион сўмлик 81 дона елим идиш ҳамда 300 минг сўмлик сув тортиш насоси далилий ашё сифатида олинди.

Фарғона туманида ўтказилган назорат тадбирида давомида Шоҳимардонобод маҳалла фуқаролар йиғинида яшовчи М.Н. хонадони холис гувоҳлар иштирокида кўздан кечирилганда фуқаро ноқонуний равишда минерал ўғитлар сотиш фаолияти билан шуғулланаётганлиги аниқланди.

Мазкур ҳолат белгиланган тартибда кўриб чиқилиб, далолатнома расмийлаштирилди ҳамда қонунбузарнинг 28,5 миллион сўмлик 3 турдаги 1,32 тонна минерал ўғитлари далилий ашё сифатида вақтинча сақлаш учун олинди. 

Назорат тадбирлари якунида ноқонуний фаолият юритиш оқибатлари, шунингдек, тадбиркорларга берилаётган имкониятлар хусусида фуқаролар билан профилактик суҳбат олиб борилди ва қонуний фаолият юритиш юзасидан зарур тавсиялар берилди.