Ўзбекистон миллий терма жамоасини аргентиналик 62 ёшли мутахассис Эктор Рауль Купер бошқаришини, яқин вақт ичида у билан расман шартномалар имзоланишини хабар қилган эдик.

Терма жамоамизнинг янги бош мураббийи бугун ўзи билан бирга термамизда ишлаши кўзда тутилаётган икки нафар ёрдамчиси билан Тошкентга учиб келди. Улар Ислом Каримов номидаги Тошкент халқаро аэропортида ЎФА ва ЎзПФЛ раҳбарияти ва ходимлари, футбол мухлислари, кенг жамоатчилик томонидан тантанали кутиб олинди. Меҳмонлар пойтахтимиздаги “Миран” меҳмонхонасига жойлаштирилди.

Эслатиб ўтамиз, Купер ва футболимиз мутасаддилари ўртасида расмий музокаралар ўтказилади, шартномалар имзоланади. Шунингдек, бугун соат 15:00 да Миллий Олимпия қўмитаси анжуманлари залида Эктор Куперни мухлисларга таништириш маросими ҳамда у билан матбуот анжумани ташкил қилинади.

Анжуман давомида аргентиналик мутахассис ўз режалари билан ўртоқлашиб, журналистлар саволларига жавоб бериб ўтади.