Давлат қабул комиссияси “Саҳродаги мўъжиза”ни қабул қилди

14:44 18 Октябр 2019 Жамият
441 0

Қандим газни қайта ишлаш мажмуасида инвестиция лойиҳаси объектларини фойдаланишга қабул қилиб олиш бўйича давлат комиссиясининг йиғилиши бўлиб ўтди. Унда “Қандим конлар гуруҳида газни қайта ишлаш мажмуаси қурилиши ва ишга туширилиши” инвестиция лойиҳаси тўлиқ қуриб битказилиб, тақдим этилгани муносабати билан Давлат қабул комиссиясининг ҳужжатни имзолаш маросими ўтказилди.

Иккита технологик тизимдан иборат газни қайта ишлаш заводи “ЛУКОЙЛ Узбекистан Оперейтинг Компани” МЧЖ томонидан бунёд этилди. Заводнинг қуввати 8 миллиард куб метр табиий газни қайта ишлашга мўлжалланган бўлиб, бу ерда газ водород сульфиддан тозаланади ва товар газ, барқарор газ конденсати ишлаб чиқарилади.

Давлат қабул комиссиясига лойиҳа доирасида бунёд қилинган маъмурий бино, таъмирлаш ҳудудлари ва завод қошидаги бошқа объектлар, 1150 кишига мўлжалланган алоҳида тураржой мажмуаси, умумий узунлиги 220 километр бўлган йиғув тизими иншоотлари, 71 та қудуқ, 285 километр автомобиль йўли, узунлиги 70 километрга тенг экспорт қувури, 55 километр узунликдаги сув таъминоти, 268 километр узунликдаги электр таъминоти тизимлари тақдим этилди.

Эслатиб ўтамиз, Қандим газни қайта ишлаш мажмуасининг тантанали очилиш маросими 2018 йил 19 апрелда Ўзбекистон Республикаси Президенти Ш.Мирзиёев, Россия Федерацияси Энергетика вазири А.Новак ва “ЛУКОЙЛ” ПАО президенти В.Алекперов иштирокида бўлиб ўтганди.

Давлатимиз раҳбари уни “саҳродаги мўъжиза” дея юқори баҳоланганди.

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?