Наманганда қишлоқ хўжалиги соҳасида амалга оширилаётган инновацион технологияларни ўрганишга бағишланган республика семинари бўлиб ўтди.

Вилоят ҳокимларининг қишлоқ ва сув хўжалиги масалалари бўйича ўринбосарлари, фермер хўжаликлари, қайта ишлаш корхоналарининг раҳбарлари қатнашган ушбу тадбирда наманганликларнинг айни йўналишдаги тажрибалари билан атрофлича танишилди.

“Халқ сўзи” газетасининг вилоят мухбири Қ. Нажмиддиновнинг маълумот беришича, Чуст туманидаги “Барака мева саноат сервис” масъулияти чекланган жамиятида ёнғоқ кўчати етиштириш ҳамда аэропоника усулида картошканинг супер элита уруғини парваришлаш борасида маҳаллий тадқиқотчилар олиб бораётган изланишлар, айниқса, кўпчиликнинг эътиборини тортди. Бу ерда тупроқсиз шароитдаги деҳқончиликнинг ўзига хос усуллари аниқ мисоллар билан тушунтирилди.

Тумандаги “Ифода” масъулияти чекланган жамиятида эса қишлоқ хўжалиги экинлари зараркунандаларига қарши курашиш бўйича ишлаб чиқарилаётган кимёвий воситалар намойиш қилинди.

"Наманган қишлоқ хўжалиги соҳасида татбиқ этилаётган илғор иш тажрибаларини бошқа ҳудудларда ҳам қўлланса, мақсадга мувофиқ бўлади. Айниқса, Чустда картошка уруғини кўпайтиришнинг ноодатий усули асосида олиб борилаётган тадқиқот ишлари кишини ҳайратга солади. Бу сингари тажрибалар мамлакатимизга катта валюта эвазига хориждан келтирилаётган супер элита уруғи масаласини ижобий ҳал қилади", — дейди Самарқанд вилоятидаги “Булунғурсандвик” қўшма корхонаси бош ҳосилоти Рустам Файзуллаев.