Боёвутда йирик саноат зонаси қурилиши бошланди

12:33 23 Июль 2018 Иқтисодиёт
271 0
Фото: "Халқ сўзи"

Сирдарё вилояти Боёвут туманида Жанубий Кореянинг “NCG ENGINIRING” компаниясининг тўғридан тўғри инвестицияси иштирокида бунёд этиладиган саноат зонаси ва унинг ишчи-ходимларига мўлжалланган аҳоли пунктига тамал тоши қўйиш маросими бўлиб ўтди.

Фото: "Халқ сўзи"

Аввал хабар қилганимиздек, мазкур ишлаб чиқариш ҳудудида 100 дан ортиқ корхона ташкил этилади. Ва унга 300 миллион АҚШ доллари миқдоридаги тўғридан тўғри инвестиция йўналтирилади. 2018 — 2023 йилларда тўлиқ фойдаланишга топширилиши режалаштирилган саноат ҳудудида 10 мингдан ортиқ ишчи ўрни яратилади. Унда косметика, фармацевтика, чарм-пойабзал, озиқ-овқат саноати каби кўплаб тармоқлар линиялари ишга туширилади. Барча ишлаб чиқариш жараёнлари юқори технологиялар асосида йўлга қўйилади.

Фото: "Халқ сўзи"

Эътиборлиси, масъулияти чекланган жамият шаклида фаолият бошлаган “NCG ENGINIRING BOYOVUT” хусусий корхонаси учун ҳар жиҳатдан қулай ҳудуддан ер майдони ажратилди. Яъни ушбу жой яқинида темир йўл, автомагистраль ҳамда юқори кучланишли электр қуввати каби инфратузилма тармоқлари мавжуд.

Тадбирда Сирдарё вилояти ҳокими Ғ. Мирзаев, “NCG ENGINIRING” компанияси президенти Жанг Ил Квеон иштирок этдилар.
Аҳмадали ШЕРНАЗАРОВ,
“Халқ сўзи” мухбири.


Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?


Кўп ўқилганлар