Бош вазир ўринбосари Каттақўрғондаги можаро бўйича яна бир марта баёнот берди

09:47 06 Июль 2018 Жамият
754 0
Фото: ХПК

Ўзбекистон Республикаси Бош вазири ўринбосари, Хотин-қизлар қўмитаси раиси Танзила Нарбаева Каттақўрғонда ички ишлар ходими томонидан таҳқирланган аёл воқеасига яна бир марта муносабат билдирди.

«Ҳурматли юртдошлар! Самарқандлик синглимизга қилинган қўпол муносабатни мен аёл сифатида, Қўмита раҳбари сифатида кескин қоралайман. Шу кимсанинг жазоланиш жараёнини албатта шахсий назоратимга оламан. Суд жараёнида ҳам албатта вакилларимизнинг қатнашиб, Аёл шаънини ҳимоя қилинишини таъминлайман. Бундай ҳолат қайтарилмаслиги юзасидан ички ишлар вазирлиги билан музокаралар ташкил қилинишини маълум қиламан», — деб ёзади Нарбаева ўзининг Facebook’даги саҳифасида.

Бундан аввалроқ Бош вазир ўринбосари каттақўрғонлик аёл воқеасига муносабатида республика хотин-қизлар қўмитаси аёллар билан, у қандай хато қилиб қўйганидан қатъий назар, бундай муносабатда бўлишга мутлақо қаршилигини, қўмита шу аёлнинг муаммоси билан албатта шуғулланишини билдириб ўтганди.

Эслатиб ўтамиз, олдинроқ 2018 йил 4 июль куни Самарқанд вилоят прокуратураси томонидан Каттақўрғон шаҳар ИИБ тезкор вакили, аёлни таҳқирлаган С. Умаровга нисбатан Ўзбекистон Республикаси Жиноят кодексининг 206-моддаси 1-қисми билан жиноят иши қўзғатилгани ҳақида хабар берилганди.


Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?


Кўп ўқилганлар