2019 йил 2 июн куни кеч соат 22дан 01-10 гача Тожикистон Республикаси Суғд вилояти Конибодом тумани ва у билан чегарадош Бешариқ тумани Ворух-Дашт қишлоғининг юқори қисмида кучли ёмғир бошланди.

Кучли ёмғир ёғиши оқибатида адирликлардан оқиб тушган жала ёмғир сувлари Бешариқ тумани Янги Рапқон ва Ворух-Дашт маҳалла фуқаролари йиғинларида истиқомат қилувчи аҳоли томорқа ва қўшимча биноларига қисман талафот етказган.

Бу ҳақида Фарғона вилояти ҳокимлиги матбуот хизмати хабар бермоқда.

Хабарга кўра, 2 та хўжалик турар жой биноси шикастланган ва шу хўжаликларда истиқомат қилувчи оилалар хавфсиз жойларга зудлик билан кўчириб ўтилган.

Бугун кечаси соат 2:00 да табиий офат жойига вилоят ҳокими Ш.Ғаниев, Ички ишлар бошқармаси бошлиғи Р.Маматов, вилоят Миллий гвардия бошлиғи Х.Шералиев ва Фавқулодда вазиятлар бошқармаси бошлиғи И.Қўчқоровлар етиб келишиб вазиятни жиддий ўрганишган. 

Мазкур ҳолатни бартараф этиш юзасидан штаб ташкил этилди ва зарур чора тадбирлар амалга оширилмоқда. 

Аҳоли ўртасида жароҳатланган ва шикастланганлар йўқ.