Ўзбекистоннинг АҚШдаги элчихонасида Халқаро республика институти(IRI)нинг Евроосиё мамлакатлари бўйича бўлими директори Стефан Никс ва ушбу муассаса вакиллари билан учрашув бўлиб ўтди. 

Ташқи ишлар вазирлиги берган хабарга кўра, мазкур мулоқот IRI кузатувчиларининг шу йил Ўзбекистонда бўлиб ўтадиган парламент сайловларида иштирок этиши масаласи, шунингдек, Олий Мажлис ва АҚШ Конгресси ўртасидаги ҳамкорликни фаоллаштириш бўйича қўшма чора-тадбирларни муҳокама қилиш мақсадида ташкил этилди.

Музокаралар давомида Ўзбекистонга IRI мониторинг миссиясини ташкил этишга келишиб олинди. Америка делегацияси ўз таркибида Конгресс вакиллари, АҚШ ва Ғарбдаги бошқа давлатлар етакчи экспертларини ҳам қамраб олиши кутиляпти. 

Халқаро республика институти мутасаддилари Ўзбекистонда бўлажак парламент сайловлари умуман янгича муҳитда ўтказилишига ишонч билдирди. Уларнинг фикрича, мамлакатимизда давлат ривожланишининг асосий йўналишлари бўйича қарорларни қабул қилиш жараёнида қонунчилик ҳокимияти ролини мустаҳкамлаш, депутатлар ва сенаторлар фаоллиги ҳамда ташаббускорлигини ошириш, парламент аъзоларининг ўз сайловчилари олдидаги ҳисобдорлигини кучайтиришга алоҳида эътибор қаратиляпти. Бу ўз навбатида сайловларга ҳам ижобий таъсир кўрсатади.