Андижон шаҳридаги 7 та марказий кўчаларда велосипедчилар учун умумий 28,6 км узунликдаги йўлакчалар ташкил қилинади. Бу ҳақда вилоят ҳокими Шуҳратбек Абдураҳмоновнинг Facebook‘даги саҳифасида маълум қилинган.

Қайд қилинишича, режага кўра, бир томонлама йўлакчаларнинг эни 2,25 метр, икки томонлама йўлакчаларники 3,25 метр бўлиши кўзда тутилган.

Маълумот учун, Андижон шаҳрида 425 минг аҳоли истиқомат қилади. Шаҳарда қарийб 40 мингга яқин автотранспорт воситалари мавжуд. Вилоят миқёсида эса 187 мингта автоулов бор.

“Қатновнинг кўплиги, атроф-муҳит мусаффолигини сақлаш масаласи пиёда ёки экологик тоза транспорт воситасида ҳаракатланишни кенг тарғиб қилишни тақозо этади. Мисол учун Хитойда деярли 70 фоиз аҳоли велосипеддан фойдаланади”, дейилади хабарда.

Дастлабки босқичда 500 та замонавий велосипедлар олиб келиниб, 20 та прокат маскани ташкил қилинади ва барча масканлар ягона электрон тизимга уланган ҳолда ишлайди. Бундан ташқари ушбу йўналишда ахборот технологияларини кенг қўллаган ҳолда велосипедларни ижарага олишдан тортиб уни тўловлари тўлиқ автоматлаштирилади. Бу борада вилоят ҳокими Ахборот технологиялари ва коммуникацияларини ривожлантириш бошқармасига аниқ таклифларни ишлаб чиқиш ва бу йўналишда хорижий давлатлар тажрибасини ўрганиш бўйича топшириқларни берди.