Мансабдорлар пахта ҳосили учун ажратилган имтиёзли кредитларнинг 58,7 млрд. сўмини мақсадсиз сарфлаган​

20:11 18 Август 2020 Иқтисодиёт
282 0

Бугун Бош прокурор раҳбарлигида қишлоқ хўжалиги соҳасида, жумладан ғўза парвариши ва пахта йиғим-теримига доир қонунчилик ижросини таъминлаш масалаларига бағишланган видеоселектор йиғилиши ўтказилди. Бу ҳақда БП матбуот хизмати хабар берди.

Йиғилишда Бош прокуратура, Вазирлар Маҳкамаси ҳузуридаги Агроинспекция, вилоят ва туман прокурорлари, вилоят ва туман ҳокимларининг соҳага масъул ўринбосарлари ҳамда бошқа мутасадди идоралар вакиллари иштирок этди.

Селектор йиғилишида қишлоқ хўжалиги экинларини етиштириш, айниқса ғўза агротехникаси ва пахтани йиғиштириб олиш борасидаги ишлар аҳволи танқидий муҳокама қилиниб, қонун бузилиши ҳолатлари тизимли тус олганлиги оқибатида қатор муаммолар юзага келганлиги таъкидланди.

Хусусан, республика бўйича жами 210 минг гектар, шундан Андижон вилоятида 3,7 минг, Бухорода 3,8 минг, Тошкентда 5,4 минг, Наманганда 6,4 минг, Навоийда 8,3 минг, Фарғонада 8,5 минг, Сурхондарёда 9,7 минг, Қашқадарёда 12,6 минг, Самарқандда 18,6 минг, Хоразмда 17,9 минг, Қорақалпоғистон Республикасида 26 минг, Сирдарёда 38,5 минг, Жиззахда 50 минг гектардаги ғўзалар ривождан орқада қолмоқда.

Сув ресурсларидан самарали фойдаланиш чоралари кўрилмаганлиги оқибатида республикадаги барча манбалардан ғўзани суғориш учун бир кунда 1 270 метр. куб секунд сув олиниб, ушбу миқдордаги сув билан 55 - 60 минг гектар майдонни суғориш мумкин бўлса-да, амалда 45 минг гектар суғорилмоқда.

Мирзачўл, Сайхунобод, Қизириқ, Бўка, Элликқалъа, Ўзбекистон, Муборак, Мингбулоқ, Чуст, Пахтачи туманларида 1,5 - 2 минг гектар майдондаги ғўзалар чанқаган бўлишига қарамай, суғориш ишлари асоссиз кечиктирилмоқда.

Қишлоқ хўжалигини давлат томонидан қўллаб-қувватлаш жамғармасидан ажратилган имтиёзли маблағлар мақсадсиз ишлатилган.

«Агробанк» филиаллари мансабдор шахслари томонидан жорий йил пахта ҳосили учун ажратилган имтиёзли кредит маблағларининг 58,7 млрд. сўми мақсадсиз сарфлаб юборилган.

Ўтган йилги харажатлардан жами 1 трлн. 767 млрд., шундан 1 трлн. 708 млрд. сўми кластерлардан ҳамда 59,5 млрд. сўми фермер хўжаликларидан қайтарилмаган.

Кластер корхоналарининг 19 таси олти ойдан буён муддати ўтган 433 млрд. сўм қарздорликдан бир сўмини ҳам қайтармаган.

Соҳа мутахассисларининг ҳисоб-китоблари ҳамда ҳудудлардан олинган таклифларга кўра, жорий йилда 829,2 минг майдонда ғўза дефолиациясини ўтказиш режалаштирилмоқда.

Бироқ Қорақалпоғистон Республикаси, Қашқадарё, Жиззах, Андижон, Самарқанд ва Тошкент вилоятларида 6 - 8 фоиз, Бухорода 12 фоиз, Хоразмда 25 фоиз, Сурхондарёда 29 фоиз дефолиант захира қилинган бўлса, Навоий, Наманган, Сирдарё ва Фарғона вилоятларида умуман захира қилинмаган.

Шу билан бирга, республиканинг табиий-иқлим шароитларидан келиб чиқиб, 42 534 гектар майдонларга картошка экиш режалаштирилган бўлса-да, режага нисбатан 3 717 гектар майдонга картошка экилмаган.

Кун тартибидаги масалалар юзасидан Қашқадарё, Сурхондарё, Самарқанд, Сирдарё, Бухоро вилоятлари прокурорлари ва уларнинг соҳавий ўринбосарлари, мазкур вилоятларнинг ҳокимларининг қишлоқ ва сув хўжалиги масалалари бўйича ўринбосарлари ва бошқа мутасадди раҳбарларнинг тушунтиришлари эшитилди.

Қайд этилган камчиликларни зудлик билан бартараф этиш ҳамда соҳага доир қонунлар ижроси устидан назоратни тубдан кучайтириш бўйича аниқ топшириқлар берилди.

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?