Jismoniy tarbiya va sport vaziri oʻzi oʻqigan maktabga kitoblar va sport jihozlari sovgʻa qildi

15:06 27 Mart 2019 Jamiyat
420 0

Foto: Jismoniy tarbiya va sport vazirligi

Bugun, 27 mart kuni Jismoniy tarbiya va sport vaziri Dilmurod Nabiyev poytaxtimizning Uchtepa tumanidagi 4-umumtaʼlim maktabiga borib, oʻzi taʼlim olgan ushbu muassasaga sport jihozlari hamda shaxsiy kutubxonasidan kitoblar sovgʻa qildi. Bu haqda Jismoniy tarbiya va sport vazirligi matbuot xizmati xabar berdi.

Maktab jamoasi va oʻquvchilar bilan boʻlgan suhbat chogʻida vazir oʻquvchilarning boʻsh vaqtlarini mazmunli oʻtkazish boʻyicha Prezidentimiz tomonidan berilgan topshiriqlar ijrosini taʼminlashda har bir inson faollik koʻrsatishi lozimligini taʼkidladi.

– Umid qilamizki, oʻquvchilarimiz bu kitoblarni oʻqib oʻz bilim va koʻnikmalarini yanada mustahkamlashadi. Yoshlarimiz qaysi sohani tanlamasinlar, ularning har tomonlama barkamol inson boʻlib yetishishlari uchun nafaqat maʼnan, balkim jismonan rivojlanish ham muhim rol oʻynaydi. Shuning uchun, oʻquvchilarimiz boʻsh vaqtlarini turli zararli odatlarga sarflashlariga yoʻl qoʻymaslik uchun ularni kitob oʻqishga, sport bilan shugʻullanishga daʼvat etishimiz zarur, – dedi Dilmurod Nabiyev 

Eslatib oʻtamiz, rahbarlarni oʻzi taʼlim olgan maktab kutubxonasiga kitoblar sovgʻa qilish tashabbusi 19 mart kuni yoshlar maʼnaviyatini oshirish, ularning boʻsh vaqtini tashkil etishda koʻmak berish, yoshlar orasida kitob oʻqishni targʻib qilishga bagʻishlangan yigʻilishda Prezident Shavkat Mirziyoyev tomonidan ilgari surilgan edi.


Izohlar

Hozircha hech kim fikr bildirmagan. Balki Siz birinchilardan bo'larsiz?