Javobgarlikdan ozod qilish muddatlari qisqartirildi

14:26 28 Iyun 2018 Siyosat
869 0

Jinoiy javobgarlikka tortish muddatining o‘tib ketganligi munosabati bilan jinoyat uchun javobgarlikdan ozod qilish muddatlari qisqartrildi

Oliy Majlis Senatining o‘n beshinchi yalpi majlisida senatorlar “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘zbekiston Respublikasi qonunini ma’qulladi.

Mazkur masala yuzasidan ma’ruza qilgan Senatning Qonunchilik va sud-huquq masalalari qo‘mitasi raisi B. Matmurodov qonun 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilangan vazifalarning ijrosini ta’minlash yuzasidan ishlab chiqilganini ta’kidladi, deb yozmoqda O‘zA.

Qonun bilan ko‘plab qonunlarga o‘zgartish va qo‘shimchalar kiritildi.

2017-2021 yillarda Harakatlar strategiyasini “Faol tadbirkorlik, innovatsion g‘oyalar va texnologiyalarni qo‘llab-quvvatlash yili”da amalga oshirishga oid Davlat dasturida ko‘rsatilganidek, jinoiy javobgarlikka tortish muddatining o‘tib ketganligi munosabati bilan jinoyat uchun javobgarlikdan ozod qilish muddatlari qisqartirildi.

Unga ko‘ra, agar jinoyat sodir etilgan kundan boshlab quyidagi muddatlar:a) ijtimoiy xavfi katta bo‘lmagan jinoyat sodir etilgan kundan boshlab – ikki yil;b) uncha og‘ir bo‘lmagan jinoyat sodir etilgan kundan boshlab – to‘rt yil; v) og‘ir jinoyat sodir etilgan kundan boshlab - sakkiz yil; g) o‘ta og‘ir jinoyat sodir etilgan kundan boshlab – o‘n to‘rt yil o‘tib ketgan bo‘lsa, shaxs javobgarlikdan ozod qilinadi.

Agar ijtimoiy xavfi katta bo‘lmagan yoki uncha og‘ir bo‘lmagan jinoyat sodir etilgan kundan boshlab o‘n yil, og‘ir yoki o‘ta og‘ir jinoyat sodir etilgan kundan boshlab yigirma besh yil o‘tgan bo‘lsa, shaxs javobgarlikka tortilishi mumkin emas.

Jinoiy tajovuzdan jabrlangan shaxslar huquqlari himoyasini amalda ta’minlash hamda jinoyatchilikka qarshi kurashuvchi organlar mansabdor shaxslarining mas’uliyatini oshirish maqsadida jinoyatni hisobdan olishdan qasddan yashirganlik uchun jinoiy javobgarlik kuchaytirildi.

Ushbu qonun O‘zbekiston Respublikasi Konstitutsiyasiga, 1 ta konstitutsiyaviy qonuniga, 11 ta kodeksiga, 68 ta qonuniga va O‘zbekiston Respublikasi Oliy Majlisining 1 ta qaroriga o‘zgartishlar kiritishni nazarda tutuvchi 84 moddadan iborat.

Qonunlarga kiritilgan yuqoridagi kabi va boshqa yangiliklar, o‘zgartish va qo‘shimchalar bugungi kun talablaridan kelib chiqib, jamiyat va davlat rivojlanishining eng dolzarb masalalarini qamrab olgan.


Izohlar

Hozircha hech kim fikr bildirmagan. Balki Siz birinchilardan bo'larsiz?