Foto: Hasan Paydoyev/“Xalq soʻzi”

Milliy madaniyatni rivojlantirish boʻyicha barcha choralar koʻrilmoqda. Lekin ushbu soha taraqqiyotiga toʻsqinlik qilayotgan bir qator tizimli kamchiliklar saqlanib qolayotgani bor gap.

Muammolar quyidagilardan iborat edi:

• madaniyat sohasidagi munosabatlarni tartibga solishga qaratilgan yagona huquqiy baza yaratilmagan.
• yosh ijodkorlarga taʼlim-tarbiya berish, yuqori malakali kadrlar tayyorlash va ularning malakasini oshirish borasida puxta tizim yoʻq.
• aksariyat madaniyat va sanʼat muassasalarining moddiy-texnika bazasi nochor ahvolda.

Bosh prokuratura huzuridagi Axborot-tahlil multimedia markazi materiallariga koʻra, Vazirlar Mahkamasining tegishli qaroriga asosan 2013 — 2018 yillar davomida taʼmirlanishi belgilangan 894 ta madaniyat markazlaridan faqat 252 tasi yoki 28 foizi foydalanishga topshirilgan, xolos. 62 tasida taʼmirlash ishlari yakunlanmagan, 562 tasida yoxud 65 foizida qurilish-taʼmirlash ishlari umuman olib borilmagan.

Davlatimiz rahbarining “Oʻzbekiston Respublikasida milliy madaniyatni yanada rivojlantirish konsepsiyasini tasdiqlash toʻgʻrisida”gi qarorida ana shunday ogʻriqli muammolarga yechim bor.

Hujjat bilan 2019 — 2022 yillarda yangi quriladigan, rekonstruksiya qilinadigan, kapital taʼmirlanadigan va jihozlanadigan madaniyat markazlarining manzilli roʻyxati tasdiqlandi. Unga asosan, mavjud 147 ta markazning 26 tasiga yangi bino quriladi, 45 tasi rekonstruksiya qilinadi hamda 76 tasi kapital taʼmirlanadi. Bu ishlar uchun Davlat byudjetidan salkam 636 mlrd. soʻm mablagʻ ajratiladigan boʻldi.