Valentina Matviyenko boshchiligidagi delegatsiya kuzda Oʻzbekistonga tashrif buyuradi

17:35 22 Iyul 2019 Siyosat
178 0

Joriy yil 22-iyul kuni Senatda Oʻzbekiston Respublikasi Oliy Majlisi Senati Raisi Tanzila Narbayevaning Rossiya Federatsiyasining Oʻzbekistondagi Favqulodda va Muxtor Elchisi Vladimir Tyurdenev bilan uchrashuvi boʻlib oʻtdi. Bu haqda Oliy Majlis Senati Axborot xizmati “Xalq soʻzi“ga maʼlum qildi.

Uchrashuvda parlamentlararo hamkorlikni yanada mustahkamlash, shu jumladan xalqaro parlament tuzilmalari doirasida hamkorlik masalalari muhokama etildi.

Taʼkidlanganidek, Oʻzbekiston va Rossiya davlat rahbarlarining siyosiy irodasi ikki tomonlama hamkorlikni mustahkamlash va rivojlantirishga poydevor boʻlib xizmat qilmoqda. Mamlakatlar oʻrtasidagi muloqotni faollashtirishda parlamentlarning oʻrni va ahamiyati ham tobora oshib bormoqda.

Uchrashuvda joriy yilning kuzida Federal Majlis Federatsiya Kengashi Raisi Valentina Matviyenko boshchiligida Rossiya Federatsiyasi parlamenti yuqori palatasi delegatsiyasining Oʻzbekistonga tashrifini tashkil etish masalalari ham koʻrib chiqildi.

Ikki mamlakat oʻrtasidagi parlamentlararo munosabatlar yangi bosqichga koʻtarilgani qayd etildi. Jumladan, Oliy Majlis Senati delegatsiyasining 2018-yil noyabrda Rossiya Federatsiyasiga amalga oshirgan tashrifi doirasida Oʻzbekiston Respublikasi Oliy Majlisi Senati va Rossiya Federatsiyasi Federal Majlisi Federatsiya Kengashi oʻrtasida hamkorlik toʻgʻrisida bitim imzolandi, shuningdek Oliy Majlis Senati hamda Federal Majlis Federatsiya Kengashi hamkorligi boʻyicha komissiyaning majlisi oʻtkazildi.


Izohlar

Hozircha hech kim fikr bildirmagan. Balki Siz birinchilardan bo'larsiz?