Oʻzbekiston Isteʼmolchilar huquqlarini himoya qilish jamiyatlari Federatsiyasi bundan olti oy muqaddam Chirchiq shahrida oʻz-oʻzidan yonib ketgan COBALT avtomashinasi xususida maʼlumot bergan va bir qancha saʼy-harakatlardan soʻng isteʼmolchiga javobgar “QIBRAY AVTO-MOTO SERVIS” MCHJ tomonidan 97.479.380 (toʻqson yetti million toʻrt yuz toʻqson yetti ming uch yuz sakson) soʻm miqdorda kompensatsiya undirilishi toʻgʻrisida sud qaroriga erishilgani xususida xabar bergan edik.

Buni qarangki, bu muammo shu bilan yakun topmadi. “QIBRAY AVTO-MOTO SERVIS” MCHJ rahbariyati ushbu qarordan norozi boʻlib Oʻzbekiston Respublikasi Oliy sudiga nazorat tartibida murojaat qilgan. 2019-yil 11-noyabr kuni Oʻzbekiston Respublikasi Oliy sudi tomonidan “QIBRAY AVTO-MOTO SERVIS” MCHJ tomonidan nazorat tartibida berilgan shikoyat koʻrib chiqildi va quyidagicha ajrim qildi.

“Javobgar “QIBRAY AVTO-MOTO SERVIS” MCHJ rahbarining shikoyati boʻyicha sud hujjatini nazorat tartibida qayta koʻrish uchun asoslar mavjud emas deb topilsin.” Bundan tashqari “QIBRAY AVTO-MOTO SERVIS” MCHJ dan davlat daromadiga 3.899. 896 (Uch million sakkiz yuz toʻqson toʻqqiz ming sakkiz yuz toʻqson olti soʻm) davlat boji undirilishi ham sud qarorida keltirib oʻtildi.